En la sepmaine d'après la saint Luc commençant le 20e d'octobre.
A Jehan Perier, verrier, pour 6 jours qu'il a besongnié ès paneaux de la haulte verrière de Saint Lubin qui est près du clochier de plon, par jour 4 s.
A Jehan Leraut, plommier, pour 6 jours qu'il a besongnié à soulder ou petit clochier de plon et à gecter du plon en table, pour jour 5 s.
A Estienne Aveline, pour 6 jours qu'il a ouvré à faire ce que dit est avec ledict Leraut, par jour 3 s. 4 d.
A Jehan Motet, pour 4 jours qu'il a besongnié avec les dessus nommez, par jour 3 s. 4 d.
A Guillaume Brifer, maçon, pour 3 jours qu'il a besongnié à abatre ou despecier et à reffaire le mur faisant la closture du cuer de l'eglise à l'endroit et là où doit estre faicte et assise une chambrète pareille et semblable aux autres chambrètes nagaires faictes, pour jour 4 s. 3 d.
A Jehan Prestreau, pour 3 jours qu'il a servi ledict maçon, pour jour 2 s. 1 d.
A Jehan Douge, pour 6 jours qu'il a besoignié tant à nectaier l'eglise comme à destaindre les chandelles, par jour 20 d.
A Denis Dumesnil, esveilleur, a esté donné pour lui aidier à supporter la despence faicte durant sa maladie, 10 s.
A Jehan Selerin, varlet de Philippot Mauvoisin, a esté donné pour son vin d'avoir ferré et mis les chesnes de la librarie, 10 s.