Dame ysengrine estoit eagie de .lxv. ans ou environ/ belle femme avoit esté en son temps mais elle estoit devenue fort ridee. les yeulx avoit enfonssez et la bouce grande et large/ cinq maris avoit eu/ sans les acointes de costé. Elle se mesloit en sa viellesse de recevoir les enfans nouvellement nez. mais en sa jonesse elle recevoit les grans enfans. moult experte fut en pluiseurs ars. Son mari estoit asses jone duquel elle estoit fort jalouse/ et dont elle faisoit souvent grandes complaintes a ses voisines. Touteffois licence comme dit est obtenue/ elle commença son euvangille et prist son thume sur son mari en hongnant et dist.
Cy commencent les chappitres de l'euvangile dame ysengrine du glay pour le lundy.
Mes bonnes compaignes et voisines/ il n'est aucune de vous qui ne sace que je prins mon mari josselin plus pour par sa beaulté que pour sa richesse/ car povre compaignon estoit. Et vela je ne le vey ne hier ne au jour d'huy/ dont j'ay grant doleur au cuer. Et certes il a grant marchié des biens que mes maris ses predecesseurs ont parcidevant a grande paine et doleur assemblez. je croi que ce sera ma mort.
Et a ce propos et pour le premier chappitre/ je dy pour aussy vray comme euvangile que l'omme qui despent indeuement les biens qui lui viennent de par sa femme et sans son gré et congié: il en rendera conte devant dieu comme de chose emblee.
Glose. Sur ce chappitre dist une ancienne matrone nommee griele femme de jehan joquesus. Certes cellui mari qui fait contre ce chappitre/ est mis aprés sa mort ou purgatoire des mauvais maris en un baing plain de soulphre ardant. s'il n'a faitte sa penitance en ce monde par les hospitaux.
Le second chappitre.
Il n'est riens plus certain que le mari qui va au contraire de ce que sa femme lui conseille et veut faire/ et qui la contredist de chose qu'elle dye: il est faulx et desloyal parjur.
Glose. Certes dist gombaude du fossé j'en ay veu pluiseurs miracles de ceulx qui ont transgessé ce chappitre. et mesmes mon parastre se rompy la jambe pour ce qu'il n'avoit volu croire le conseil de ma mere.
Le tiers chappitre.
Homme qui sa femme bat pour quelconque cause que ce soit n'aura jamais pour priere qu'il face faire grace de la vierge marie/ se premierement il n'a obtenu pardon de sa femme.