OLYMPIE.
Vos desirs sont pareils, & pourroient mesme chose.
HONORIUS.
Athenaïs & vous differez en ce poinct
Qu'elle eût une Rivale, & vous n'en avez point.
OLYMPIE.
En un autre, Seigneur, nous differons encore,
Elle ayma les grandeurs, & moy je les abhorre.
HONORIUS.
Hé bien, puis que mon rang fait vostre aversion,
Je ne forceray point vostre inclination,
Mais je conjureray vostre rigueur extréme
De se rendre en faveur de cet autre moy-mesme,
De ce cher Alexis, de qui les qualitez
Ont beaucoup de raport avecque vos beautez:
Il est jeune; il est noble, adroit, & magnanime,
Et (si vous me croyez) digne de vostre estime.
Acceptez, Olympie, acceptez cet Espoux,
Vous l'aimez, je le sçais; pourquoy rougissez vous?
En un si juste choix vous n'estes point blâmable,
Alexis vous cherit, Alexis est aimable,
Et le ciel fait en vous des accords trop charmans
Pour separer jamais deux si parfaits Amans.
OLYMPIE.
Ouy, Seigneur, je l'advoue, Alexis a des charmes
Contre qui ma rigueur n'a que de foibles armes,
Mon coeur contre ses traits a long-temps combatu,
Mais enfin il se rend, & cede à sa vertu,
Et pour luy mon amour est tellement entiere
Qu'elle sera ma flâme, & premiere & derniere;
J'eus pour luy cet instinc presque dés le berceau,
Et je l'emporteray jusque dans le tombeau,
Où mesme le destin unissant nos deux ames
Souz nos cendres encor fera vivre nos flâmes.