«Li rois Phelippes n'ot pas oubliet le très-grant honte que li rois Henris li avoit, fait de sa serour. Il estoit un jour à Biauvais, et li rois Henris estoit à Gerberoi, une abbaye de moines noirs à quatre lieues de Biauvais. Quant li rois Phelippes le sot, si en fu merveilles liés, car il se pensa que il se vengeroit de la honte, sé il pooit; et fist souper ses chevaliers et sa gent de haute eure, et donner avaine as chevaux. Et quant il fu aviespri, si fist sa gent armer, né onkes ne lor dist que il avoit empenset à faire. Et chevaucièrent tant que il vinrent à Gerberoi u li rois Henris estoit sauvés. Et ançois que li rois fust couciés, entrèrent-il en la sale u li rois Henris estoit acoustés sour une coute. Quant li rois Phelippes le vit, si traist l'espée et li courut sus apiertement et le quida férir parmi la teste, quant uns chevaliers sali entre dui et li destorna son cop à férir. Et li rois Henris sali sus tous espierdus et s'en fui en une cambre et fu bien li huis fremés. Et quant li rois Phelippes vit qu'il ot pierdu son cop, si en fu moult dolans et s'en revint à Biauvais, car il n'avoit mie là boin demorer. Quant li rois Henris sot que ce avoit esté li rois Phelippes ki occire le voloit, si dist: Fi! or ai-je trop vescu quant li garchons du France fius au mauvais roi m'est venus coure sus. Adont sali li rois empiés et prist un frain et s'en ala as cambres courtoises tous désespéré et plain de l'ainemi, et s'estrangla des riesnes dou frain. Quant sa maisnie vit que li rois n'estoit mie entr'aus, si le quisent partout et tant qu'il le trovèrent estranglé et les riesnes entour le col. Si en furent à merveilles esbahis. Et lors le prisrent et levèrent et le misent en son lit, et fisent entendant au peuple qu'il estoit mors soudainement. Mais n'avient pas souvent que tele aventure aviegne de tel homme que on ne le sache; car çou que maisnie scet n'est mie souvent celé. (Msc. du roi, fonds de Sorbonne, 454, f° 60.)
II.
ANNEE 1190.
Coment le roy Richart fu coroné. Et coment le roy Phelippe prist congié à Saint-Denis.
Après la mort le roy Henry, fu couronné Richart, conte de Poitiers. Mais en la première année de son règne luy avinrent deux moult laides aventures. Car quant il dut premièrement entrer en Gisors, après ce qu'il fu couronné, le feu se prist en la ville si que le chastel fu tout ars. Le jour après, quant il s'en issoit, le pont de fust brisa soubs ses piés, et si passèrent toutes ses gens oultre sans nul encombrement, et il tout seul chéy au fossé à tout son cheval.
Pou passa de jours après que la paix fu confermée et parfaite en la fourme et en la manière qu'elle avoit esté pourparlée entre le roy Phelippe et le roy Henry. Mais le bon roy Phelippe qui ne mist point en oubli la débonnaireté et la largesce de son cuer, donna au roy Richart, pour le bien de paix, la cité de Tours et du Mans, Chastel Raoul et toutes les appartenances que il avoit conquis sur le roy Henry son père. Et le roy Richart qui tantost luy voult la bonté rendre luy donna et quitta perpétuelment à luy et à ses hoirs le chastel de Crezac, d'Issodun et d'Alone[85]. Si fu illec ordonné quant et coment il mouveroient en la terre d'oultre mer, pour accomplir leur voiage.
Note 85: Crezac. Graçay, petite ville du Berry. Pour le mot Alone, c'est une faute du traducteur, et Rigord dit à sa place: «Totum feudum quod habebat in Alverniam.»
En cel an, en la dixième kalende de mars, mouru la noble royne Ysabel, femme le roy Phelippe. Le corps d'elle fu ensépulturé en l'églyse Nostre-Dame-Saincte-Marie[86]; l'évesque Morise fist establir un autel pour luy, et le roy y mist deux chapellains et establi à chascun quinze livres parisis de rente. Desquels l'un devoit chanter pour l'ame de la dicte royne et l'autre pour les ames ses ancesseurs.
Note 86: De Paris.
En l'an de l'Incarnation mil cent quatre-vings et neuf, environ la feste saint Johan-Baptiste, le roy qui plus ne voult attendre à mouvoir en la besoingne Nostre-Seigneur, ala à Saint-Denys pour prendre congié au glorieux martir et à ses compagnons, selon la coustume des anciens roys de France. Car quant il meuvent à armes encontre leurs ennemis, il doivent venir visiter les martirs et prendre l'oriflambe sur l'autel, pour eux garder et pour eux deffendre, et doibt estre portée tout devant, quant l'en se doit combatte. Dont il est aucune fois avenu que quant leur ennemis la veoient, il estoient si forment espouventés qu'il s'en fuioient mas et confus.