Eheu! quam difficile est crimen non prodere vultu!
O qu'il est mal aisé de tenir caché le meffait! Les voylà donc bien à sec, bien faits de corps, sans manteau, sans poignard ny espée, encor moins de mousquet! Et pourquoy cela? Parceque
On peint Bellonne et Mars tousjours tous nuds,
Car ceux qui s'y sont pleus, tels en sont revenus.
Ha ha! ils pensoient tout fendre nostre gros bois[254]; mais ils ont faict comme l'ours, qui, pour avoir le miel caché dans le chesne entr'ouvert, s'y enserra gentiment les pattes, parce que le renard osta les coins[255]. Ils se promettoient trop à un coup; mais poisson qui nage n'est pas prest; le Bouillon[256] n'en vaut rien, il est trop fade. O qu'ils sont tristes! car
Faute d'argent n'emplit pas la bouteille;
Faute d'argent rend l'homme tout deffaict;
Faute d'argent l'homme gras et refaict
Rend maigre et sec, tremblant comme la feuille[257].
Jamais le peintre Appelles ne depeignit mieux sa Venus que les voylà proprement despeints, et, comme dit la fin de la prediction,
C'est trop folement despendu,
Quand pour despendre on est pendu;
Qui plus despend qu'il n'a vaillant
Faict le cordeau dont il se pend.
Qu'on fasse son profict: baste pour ce coup! Motus, la caille pond. C'est assez, ostez-vous de là.
