[4] a zirondon = in giro.
[5] assal = acciaio.
OTOBRADA
Semo a metà de otobre, el mese classico
De le fogie[1] da i álbari cascae;
El mese dei poeti malinconici,
De l'anime da amor mistificae.
Beato sia l'otobre! Canta in estasi
El mio zovene cuor tuto contento….
Da la campagna xe tornà el mio idolo….
Urla che 'l cuor no ti me giazzi, o vento!
[1] fogie = foglie.
RELOGIO FERMO[1]
Se ga fermà el relogio là in saleta;
A le sete e tre quarti el s'à fermà;
A l'alegro tic-tac no dava reta:
Desso, tasendo, che tristezza el fa!
Quel sôn pareva farme compagnia:
Quanta, senza de lu, malinconia!
Quel sôn me dava vita e bon umor,
Tic e tac el bateva col mio cuor.