Sarranno vint'ore, poco cchiú poco meno. Quanno chisto d' 'e pigne, 'e rimpetto, nchiude l'agenzia ce putite giurá ca so' vint'ore. ( siede accanto alla tavola ) Be', che se dice? Ve vulisseve fa sta capa?
Amalia
( Accennando di no )
Che v'aggia di', neh, Nunziá?... ( sospira ) E buie nun mme dicite niente? ( siede ) Diciteme vuie quacche cosa...
Nunziata
Io? E che ve pozzo di', sora mia? Vuie 'o ssapite ca io abbado 'e fatte mieie. Io nchiudo l'uocchie e passo. Quase quase nun mme pare manco cchiú ca so' d' 'o quartiere, cu tutto ca ce so' nata e nce aggio fatte 'e figlie! I' chessá, io ccá veco tanta gente nova, veco succedere tanta mmalore 'e nuvitá!...
Amalia
Me' Nunziá, diciteme quacche cosa! ( Avvicina la sedia a quella di Nunziata ).
Nunziata
Ma che vulite sape'? ( guarda alla porta ).