[V bis. L' AUCIELLO GRIFONE]
(Variante raccolta in Avellino, in P. U.)
Nci steva 'na vota 'no Re, chi teneva tre figli. 'Sto Re cadivo malato co' l' uocchi; e mannavo a chiama' i primi miedici d' 'o munno, pe' ssi fà' sanà'; e nisciuno nci potivo. Finalmente chiamavo 'no segretista. E chisto li dicivo, ca nci voleva 'na penna de l' auciello crifone; e ca 'st' auciello steva dinto a 'no deserto. Quanno ss' ancappava e li tiravono 'na penna, tanno isso steva buono; pecchè co' chella penna ssi faceva 'na polvere; e chella polvere ssi metteva dinto a l' acqua, e po' ssi lavava l'uocchi. 'O padre ssi chiamavo i tre figli, e li dicivo:—«Sentiti, figli mmii. Pe' mmi sanà', nci vo' 'na penna de l' auciello crifone; chi de vui tre mm' 'a porta, io li davo 'o trono e 'a corona».—I figli ssi mettettero 'ncammino. Quanno fu 'â metà d' 'a via, ssi spartero. 'O primo sse ne jivo pe' 'na via, 'o secondo pe' 'n'auta, e 'o terzo pe' 'n' auta. A 'o cchiù piccirillo li comparivo 'no vecchiariello e li dicivo:—«Bello figlio, teccoti 'sto granodinio; quanno arrivi dinto a chillo deserto, mena 'sto granodinio 'nterra. Mente l' auciello ss' 'o mangia, tu li tiri 'na penna e te ne scappi».—Chisto accossì fece. Ssi pigliavo 'a penna e sse ne steva tornanno, quanno 'ncontravo i frati, chi l'addommannaro:—«Avissi trovato 'a penna?»—E isso risponnivo, ca sì. Chisti, pe' 'nvidia, ca l'urdimo frate ss' avev'a piglia' 'o trono e 'a corona, li levaro 'a penna e l' accidettero e 'o 'nfossaro sotto a 'no pede 'e pera. Loro jettero addò lo padre e li portaro 'a penna. 'O padre, tutto contento, divo a 'o primo figlio 'o trono e 'a corona. Ma po' steva 'mpenziero, ca l' urdimo figlio no' veneva; e finalmente, doppo tanto, ssi persuadivo, ca era muorto, pecchè i figli l' avevono ditto, ca no' l' avevono visto cchiù da che erono partuti. 'No juorno, 'no pecoraro, mente pasceva 'e pecore sotto a chill'albero, addò' steva 'o muorto, vedivo ca 'o cane scavavo e trovavo 'n uosso. 'O pecoraro, appena 'o vedivo, dicivo:—«Che bello fiscariello!»—Lo mettivo 'mmocca e voleva sonà', mente sentivo 'na voce, chi asceva 'a dinto 'o fiscariello, chi diceva:—«Pecoraro, chi 'mmocca mmi tieni, | Tienimi astrinto e no' mmi lascià'! | Pe' 'na penna d' auciello crifone, | Fratemo fui lo traditore».—'Sto pecoraro remanivo maravigliato; e, sapenno 'sto fatto d' 'o figlio d' 'o Re, sse ne jivo sotta 'ô palazzo[1] reale, e accominciavo a sonà'. I serveturi accomminciaro a capì' 'na cosa, e subbito 'o dicero a 'o Re. 'O Re 'o fece saglie' 'ncoppa; e volivo sonà' propio isso. E l' uosso cantava.—«Caro padre, chi 'mmocca mmi tieni, | Tienimi astrinto e no' mmi lascià'! | Pe' 'na penna d'auciello crifone, | Fratemo fui lo traditore! | Castiga lo primo, e l' urdimo perdona».—'O padre, quanno sentivo 'sta nova, pigliavo i figli, 'e fece arde' dinto a 'na votte 'e pece e le fece menà' a mare. 'O pecoraro, ss' 'o tenivo po' figlio e li divo 'o trono e 'a corona.[2] Felice e cutoliati,[3] nui stamo quà assettati.
[NOTE]
[1] Se ne ivo sotta 'ô palazzo reale, andò sotto la Reggia, o, come avrebbe detto il De Notariis, vi si traslò: bel vocabolo!
E 'l fremito e 'l fragor mostra, che deggia
Del Tartaro traslarsi ivi la reggia
(Costantino, XII. 58).
[2] Ricorda l'arietta metastasiana:
Nasce al bosco in rozza cuna
Un felice pastorello;