Dux jubet expertus mox proram obvertere in altum,
Ut freta permiscent iterato murmure venti:
Littoreis ne forte salis violentia molem
Turbine jactatam nimboso impingat arenis.
Huc vi, qua pollent, contendit Numen utrumque:
Qua circum patuit Nereus, circumvenit horror.
Luctantur varia Fratres regione furentes;
Fluctibus incursant fluctus; subito mare motu
Intremuit longum: mediæ telluris ab imis
Visceribus credas Orbem Plutona movere.