Fessa gravi Morpheus devinxit membra sopore.
At non perjuræ qui præsidet impius urbi,
Nec dulces carpit somnos, aut pectore curas
Consopire valet: scelerum tot conscia, primum
Se, cogente malo, nunc anxia corda remordent.
Non dolet amissam navim; non cæde peremptos
Terrifica cives: sibi tantum prospicit uni.
Jam videt ultrices flammas; cervicibus ensem
Jam videt instantem; prostratas jam videt arces.
Mens pendet: quid enim, potius quod vellet, habebat?