Федор. Як ти дяка. То правда, же я марнотратил, я забыл о Бозѣ, я до дѣдка жыл, но и ты лѣпша не была. Олено! Де муж марнит, там полбѣды, але де жена блудом ходит, де жена пессѣми путьми ся пустит, там вшитко до дѣдка пропадае.
Явление II.
Богумила убрана порядно, несе горнець молока и бѣлый хлѣб и дае Оленѣ.
Богумила. Сосѣдко не потупте божый дар, ану, похлипайте мало солодкого молока, а закусьте хлѣбика, бо вы дуже хвора, прошу вас приймите.
Олена ( с презрѣнием ). Я од тебе не прошу, держ собѣ твое молоко; я не стерплю, обы ты из мене смѣх собѣ чинила. ( Обертае ся од Богумилы ).
Богумила. Сосѣдко не сердите ся, приймите ласкаво; видите мене Господь пожегнал, няй му буде честь и хвала; - я вам все принесу, вѣдь Бог прото нам удѣлит, штобы сьме и другым удѣлили, прошу приймите приятно; Господь милостивый ищи и вам наверне, так як ми навернул, не одчавайте, уповайте на Господа, он сам годен вас потѣшити.
Федор. Боже вам заплать, сосѣдко, о, вы честна особа, я стыжу ся вам до очей поглянути, я вас дуже оскорбил, но теперь Господь заганьбил мене, пышного. Сосѣдко, молю вас одпустите ми великый мой грѣх.
Богумила. Любезный Федореньку, не оскорбили вы мене, я о том болше не тямлю. Божое то росположение, да будет воля господня, божа воля, штобы кривды терпеливо износити. О, колько раз прогнѣваеме Бога, и он все милостиво прощае нам. Он поможе и вам, лем не опустьте ся Его, не оддалит ся рука божая од вас, памятайте на святы слова Пророка: "Услышит тя Господь в день печали, пошлет ти помощь од святаго, и дасть ти господь по сердци твоему." Оставайте здоровенькы з Богом! ( Одходит ).
Олена ( мече ся ). Ищи и тота собака высмѣвае ся с нас! Федоре! Я то не годна стерпити, я йду, я ту не буду, пойду межи люди, де мня никто не знае, волю служити, а смѣх из себе чинити не дам.
Федор. О, ты, скарѣдна грѣшнице, и доброе дѣло не узнаеш; ты завзята бабище; подякуй Богу, же тя люди не лишают в бѣдах и скорбех, ищи гордити ся, то уже истинное неблагодарство, то злоба диаволя. О, Боже мой милостивый! О, праведен еси Господи, и правы суть суды твои (бере горнец и хлипае). Так, богатый Федор худобному нигда еден пѣнязь не удѣлил, а теперь из чужой ласкы годуе ся! На, Олено, похлипай, а поправ ся ( Олена гнѣвливо бере и ѣсть ).