3) А который боярин, или околничей, или дворецкой, или казначей, или дияк в суде посул возмет и обвинит кого не по суду, а обыщется то в правду: и на том боярине, или на околничем, или» на дворецком, или на казначее, или на дияке взяти исцев иск, а пошлины на царя и великого князя, и езд, и правда, и пересуд, и хоженое, и правой десяток, и пожелезное взяти втрое, а в пене, что государь укажет.
26) А безчестие детем боярским, за которыми кормления, указывати противу доходу, что на том кормленье доходу по книгам; а женам их безчестия вдвое против того доходу. А которые дети боярские емлют денежное жалование, а сколько которой жалования имал, то ему и безчестие; а жене его вдвое против его жалования. А дьякам полатным и дворцовым безчестия, что царь и великий князь укажет; а женам их вдвое против их безчестия. А гостям большим безчестия пятьдест рублев, а женам их вдвое против их безчестия. А торговым людем и посадским людем, всем середним, безчестия пять рублев, а женам их безчестия против их безчестия вдвое. А боярскому человеку доброму безчестия пять Рублев, опричь тиунов доводчиков, а жене его вдвое. А тиуну боярскому, или доводчику и праветчику, безчестие против его доходу, а женам их вдвое. А крестьянину пашенному и непашенному безчестия рубль, а жене его безчестия два рубля. А боярскому человеку молодчему или черному городскому человеку молодчему безчестия рубль же, а женам их безчестия вдвое. А за увечие указывати крестьянину посмотря по увечию и по безчестию; и всем указывати за увечие, посмотря по человеку и по увечью.
32) А неделщику на судей, на бояр, и на околничих, и на дворецких, и на казначеев, и на дияков посулов не просити, и самому неделщику посулов не имати. А которой неделщик… посул возмет, и уличат его в том: и того неделщика казнити торгового казнию, а посулы на нем доправити втрое, да из недель выкинута.
53) А пошлют которого неделщика имати татей и разбойников, и ему имати татей и разбойников безхитростно а не норо-вити ему никому; а изымав ему татя или разбойника не отпустити, ни посулов не взяти; а опричных ему людей не имати. А поноровит которой неделщик татю или разбойнику по посулам, а его отпустит, и уличат его в том; ино на том неделщике истцов иск доправити, а его казнити торгового казнию да вкинути в тюрму, а в казни, что государь укажет.
62) А бояром и детем боярским судити, за которыми кормления с судом с боярским, а на суде у них и у их тиунов быти, где дворской, дворскому, да старосте и лучшим людем, целовалником. А судные дела у наместников и у их тиунов писати земским дияком; а дворскому да старосте и целовалником к тем судным делом руки свои прикладывати. А противни с тех судных дел слово в слово, писати наместничим дьяком; а наместником к тем противнем печати свои прикладывати… А без старосты и без целовалников суда не судити, и посулов наместником, и их тиуном и их людям не имати: а на государя своего тиуну и пошли-нику никому посулов от суда не просити…
68) А которому наместнику дан в кормление город с волостьми, или ему даны в кормление волости, а в которых волостех наперед сего старост и целовалников не было, и ныне в тех во всех волостех быти старостам и целовалником…
70) А кого наместничи или волостелины люди учнут давати от кого на поруку до суда и после суда, и по ком поруки не будет. — и наместничим и волостелиным людем тех людей являти в городе прикащиком городовым, да дворскому и старосте и целовалником; а в волости являти старосте и целовалником;… а не явя тех людей… к собе не сводити и у собя их не ковати. А кого наместничи или волостелины люди не явя… к собе сведут да у собя его скуют, и ко тем людем и род и племя придут… о том бити челом и являти; и прикащиком да дворскому и старосте и целовалником у наместничих или волостелиных тех людей выймати, и кого у волостелиных людей выймут скована, а им не явлено, ино на наместниче или на волостелине человеке, взяти того человека безчестие, посмотря по человеку; а чего тот на наместниче или на волостелине человеке взыщет, и тот иск взяти на нем вдвое.
80) А холопа рать полонит, а выбежит из полону, и он свободен, а старому государю не холоп; а похочет тот холоп к своему к старому государю, и того холопа явити бояром, а дияку подпи-сати на старой крепости, а пошлины имати с головы по алтыну. А которой холоп побежит с государем своим, или один побежит без государя своего, а не рать полонит, и выедет тот холоп из которыя земли опять к Москве: и он старому государю холоп по старому холопьству, опричь того, нечто кому государь пожалует даст волную грамоту.
81) А детей боярских служивых и их детей, которые не служивали, в холопи не приимати никому, опричь тех, которых государь от службы отставит.
87) А кто сорет межу, или грань ссечет, из царевы и великого князя земли, или у боярина, или у монастыря, или боярской у монастырьского, или монастырьской у боярского: и хто в тех межу сорет, или грань ссечет, ино того бити кнутьем, да истцу на нем взяти рубль. А хрестьяне меж собя, в одной волости или в селех, хто у кого межу переорет или перекосит, ино волостелю или поселскому имати на нем за боран два алтына.