Of folys that can nat kepe secrete theyr owne counsell.
Of other Foles a nomber yet I fynde
Which by theyr bablynge wordes and langage
Can nat kepe close the secrete of theyr mynde.
But all theyr counsel out they shewe at large.
So that oft therof procedeth great damage.
As Murder, myschefe, hatered and debate.
That after they repent. But than it is to late
He is a naturall fole and vndiscrete
And to hym selfe ingendryth oft great stryfe
Whiche can nat hyde his counsell and secrete
But by his foly it sheweth to his wyfe
And all that he hath done in his hole lyfe
Or that to do here after he doth purpose
To euery man suche a fole wyll disclose
The noble Sampson moste excellent of myght
And strongest man that euer was get or borne
Were nat this foly: sholde nat haue lost his syght
Nor had his here, by gyle from his hede ofshorne
And of his ennemyes ben laughyd vnto scorne
And at the last with herte wrethfull and wo
His ennemyes murdred and hym selfe also
Where as he myght haue lyued in honour
If he had kept his secretes in his mynde
With his owne wyll he dyed in great dolour.
By the fals treason of his lemman vnkynde
We may in dyuers mo examples fynde
Howe many thousandes haue suffred paynes smart
And all for shewynge the secretes of theyr hart
Amphiaraus a Prynce moste excellent
Shortened the dayes of his pore doutfull lyfe
For shewynge the preuetees of his intent
By his owne foly to his disceytfull wyfe
And thoughe he longe escaped had the stryfe
And war of Thebes whiche he dyd longe defende
Yet at the leest his tunge was his owne ende
Thus olde storyes doth oft recorde and tell
By theyr examples whiche they vnto vs gyue
That wymen ar no kepars of councell
It goeth through them as water trough a syue
Wherfore let them that quyetly wolde lyue
No more of theyr counsell to any woman showe
Than that they wolde that euery man dyd knowe
Let euery man that is discrete and sage
Of suche folys with all wysdome be ware
Whiche shewe theyr counsell by theyr hasty langage.
To euery man without all thought and care
For they of wysdome and reason ar but bare
And who that his owne secrete wyll forth tell
Howe sholde he hyde another mannes counsell
Yet other be whiche by theyr flaterynge trayne
Labour to knowe euery mannys pryuete
And by and by to shewe it forth agayne
Of them be ware for they disceyfull be.
Some other bost them of theyr felycyte
Bablynge that they haue theyr wyll in euery thynge
As prosperous welth loue, ryches and cunnynge
And of great dedes done both on see and londe
Some by theyr falshode, some by strength and vertue
But if one laboured the trouth to vnderstonde
Suche folysshe wordes sholde all be founde vntrewe
Let neuer man to suche his counsell shewe
For of one worde these folys makyth twayne
Whiche tourneth many to losse rebuke and payne
Wherfore if thou wylt that thy pryuete
Be kept secrete and nat come out at large
Be nat so folysshe to showe it unto me
Or any other if it be thynge of charge
And if thou do thou shalt be in this barge
For howe wylt thou thynke that another man
Can kepe thy counsell syns thou thy selfe ne can
If the kynge Achab had nat vttred and tolde
Vnto his wyfe his wyll and mynde so playne
By hir fals treason, and dysceyt manyfolde
Vnrightwysly Nabot had nat ben slayne
But for the same, Achab suffred great payne
By deth in batayle, and for a punysshment
His wyfe with houndes was all to torne and rent
Thus it apereth that he is wyse and ware
Whiche can his counsell kepe within his hart
For by that mean may he escape great care
And suerly lyue without yll wyllys dart
The Prophete seynge what dyuers paynes smart
Comyth oft to them whiche doth theyr secret tell
Eche man exortyth to kepe close his counsell.
The enuoy of Barklay to the Folys.
Thou man that hast thy secret in thy brest
Holde it styll there suffer it nat out to go
Who that so doth, therby shall fynde great rest
Ne to thy frende shewe nat thy mynde also
For if that he after become thy fo
As often hapneth, than myght he the bewry
So sholde thy foly tourne vnto thy great wo
Howe be it suche thynges are prouyd comonly.