CHAPITRE XII. [i.e., xi.]
A QUELLE OCCASION LES IESUITES ALLERENT EN LA NOUUELLE FRANCE, L'AN 1611. & CE QUE LES FRANÇOIS Y FIRENT DÉS L'AN 1608. IUSQUES À LEUR VENUË.
[156] NOVS auons cy-deuant discouru des terres, & peuples de la Nouuelle France, & parlãts [118] du moyen de pouuoir ayder ces Nations: à ceste occasion nous sommes tombez sur le Factum escrit, & publié contre les Iesuites. Or d'autant, que ce difamateur, & factieux (ainsi le nommeray-ie d'ores-en-auant,) commençant dés l'embarquement des Iesuites, les poursuit, comme à la trace en Canada par boys, & riuieres, mer, & terres, de iour & de nuict, en tous leurs voyages & demeures, espiant par tout de tirer sur eux à couuert & proditoirement quelques impostures, & calomnies. A ceste cause il nous faut de necessité reprendre mesmes erres pour defendre l'innocence, & rapporter au vray ce qui est de leurs actions, & deportements: ainsi que i'ay promis de faire en l'Auant-propos. Et jaçoit qu'à cest'occasion nous serons contraincts souuent de particulariser plusieurs [119] petits affaires, non guiere bien conuenables à la grauité d'vn' histoire, ny à la dignité d'vn Lecteur honnorable; toutesfois i'estime que de ceste mienne diligẽce on pourra tirer trois grands fruicts, outre la recognoissance de la verité d'auec les fraudes, & bourdes, qui de soy mesme seroit fort profitable.