CHAPITRE XXVI. [i.e., xxiv.]
A QUELLE OCCASION NOUS NOUS ARRESTAMES À SAINCT SAUUEUR, LA BONTÉ DU LIEU.
[266] OR en ce Port icy de S. Sauueur grande contention s'esleua entre les Matelots, & nostre equipage ou nous autres passagers. La cause en estoit, parce que la charte partie, & l'accord passé en France portants, que lesdits Matelots seroyent tenus anchrer en vn Port de l'Acadie, que nous leur nommerions; & là seiourner l'espace de trois mois: Lesdits Matelots se maintenoyẽt estre arriués en vn Port de l'Acadie, & que partant ledit terme de trois mois deuoit courir dés cest'arriuée. On leur repliquoit [221] que le Port n'estoit point celuy qu'on leur auoit nommé Kadesquit, & partant, que le temps ne courroit point auant qu'ils y fussent. Le Pilote s'opiniastroit là cõtre, maintenant, que iamais nauire n'estoit allé iusques à Kadesquit, & qu'il ne vouloit point se faire vn descouureur de nouuelles routes: il y auoit aussi faute, au nom de l'Acadie, pour dire la Norambegue, ce qui augmentoit la dispute: raisons deçà, raisons delà. Rien que plaidoyerie, mauuais augure de l'aduenir.