VÊPRES DU DIMANCHE.
V. Deus, in adjutorium meum intende.
R. Domine, ad adjuvandum me festina.
V. Gloria Patri, et Filio, et Spiritui sancto.
R. Sicut erat in Principio, et nunc et semper, et in secula seculorum Amen.
PSAUME 109.
Dixit Dominus Domino meo: * Sede à dextris meis,
Donec ponam inimicos tuos * scabellum pedum tuorum.
Virgam virtutis tuæ emittet Dominus ex Sion: * Dominare in medio inimicorum tuorum.
Tecum principium in die virtutis tuæ in splendoribus Sanctorum; * ex utero ante luciferum genui te.
Juravit Dominus, et non pœnitebit eum: * tu es sacerdos in æternum secundùm ordinem Melchisedech.
Dominus à dextris tuis: * confregit in die iræ suæ reges.
Judicabit in nationibus, implebit ruinas; * conquassabit capita in terrâ multorum.
De torrente in viâ bibet; * proptereà exaltabit caput.
Gloria Patri, etc.
PSAUME 110.
Confitebor tibi, Domine, in toto corde meo; * in concilio justorum et congregatione.
Magna opera Domini, * exquisita in omnes voluntates ejus.
Confessio et magnificentia opus ejus, * et justitia ejus manet in seculum seculi.
Memoriam fecit mirabilium suorum misericors et miserator Dominus: * escam dedit timentibus se.
Memor erit in seculum testamenti sui: * virtutem operum suorum annuntiabit populo suo.
Ut det illis hæreditatem gentium, * opera manuum ejus veritas et judicium.
Fidelia omnia mandata ejus, confirmata in seculum seculi, * facta in veritate et æquitate.
Redemptionem misit populo suo: * mandavit in æternum testamentum suum.
Sanctum et terribile nomen ejus: * initium sapientiæ timor Domini.
Intellectus bonus omnibus facientibus eum: * laudatio ejus manet in seculum seculi.
PSAUME 111.
Beatus vir qui timet Dominum, * in mandatis ejus volet nimis.
Potens in terrâ erit semen ejus: * generatio rectorum benedicetur.
Gloria et divitiæ in domo ejus: * et justitia ejus manet in seculum seculi.
Exortum est in tenebris lumen rectis: * misericors et miserator et justus.
Jucundus homo qui miseretur et commodat, disponet sermones suos in judicio: * quia in æternum non commovebitur.
In memoriâ æternâ erit justus, * ab auditione malâ non timebit.
Paratum cor ejus sperare in Domino, confirmatum est cor ejus: * non commovebitur donec despiciat inimicos suos.
Dispersit, dedit pauperibus, justitia ejus manet in seculum seculi: * cornu ejus exaltabitur in gloriâ.
Peccator videbit et irascetur, dentibus suis fremet et tabescet; * desiderium peccatorum peribit.
PSAUME 112.
Laudate, pueri, Dominum; * laudate nomen Domini.
Sit nomen Domini benedictum, * ex hoc nunc et usque in seculum.
A solis ortu usque ad occasum, * laudabile nomen Domini.
Excelsus super omnes gentes Dominus, * et super cœlos gloria ejus.
Quis sicut Dominus Deus noster, qui in altis habitat, * et humilia respicit in cœlo et in terrâ.
Suscitans à terrâ inopem, * et de stercore erigens pauperem.
Ut collocet eum cum principibus, * cum principibus populi sui.
Qui habitare fecit sterilem in domo, * matrem filiorum lætantem.
PSAUME 113.
In exitu Israel de Ægypto, * domus Jacob de populo barbaro;
Facta est Judæa sanctificatio ejus; * Israël potestas ejus.
Mare vidit et fugit; * Jordanis conversus est retrorsùm.
Montes exultaverunt ut arietes, * et colles sicut agni ovium.
Quid est tibi mare, quod fugisti? * et tu, Jordanis, qui conversus es retrorsùm?
Montes exultâstis sicut arietes? * et colles sicut agni ovium?
A facie Domini mota est terra, * à facie Dei Jacob.
Qui convertit petram in stagna aquarum, * et rupem in fontes aquarum.
Non nobis, Domine, non nobis: * sed nomini tuo da gloriam, super misericordiâ tuâ et veritate tuâ;
Nequando dicant gentes: * Ubi est Deus eorum?
Deus autem noster in cœlo: * omnia quæcumque voluit, fecit.
Simulacra gentium argentum et aurum, * opera manuum hominum.
Os habent, et non loquentur * oculos habent, et non videbunt.
Aures habent, et non audient; * nares habent, et non odorabunt.
Manus habent, et non palpabunt; pedes habent, et non ambulabunt; * non clamabunt in gutture suo.
Similes illis fiant qui faciunt ea, * et omnes qui confidunt in eis.
Domus Israel speravit in Domino: * adjutor eorum et protector eorum est.
Domus Aaron speravit in Domino: * adjutor eorum et protector eorum est.
Qui timent Dominum, speraverunt in Domino: * adjutor eorum et protector eorum est.
Dominus memor fuit nostri, * et benedixit nobis.
Benedixit domui Israel; * benedixit domui Aaron.
Benedixit omnibus qui timent Dominum, * pusillis cum majoribus.
Adjiciat Dominus super vos, * super vos et super filios vestros.
Benedicti vos à Domino, * qui fecit cœlum et terram.
Cœlum cœli Domino: * terram autem dedit filiis hominum.
Non mortui laudabunt te, Domine, * neque omnes qui descendunt in infernum.
Sed nos qui vivimus, benedicimus Domino, * ex hoc nunc et usquè in seculum.
CAPITULE.
Benedictus Deus, et Pater Domini nostri Jesu Christi, Pater misericordiarum, et Deus totius consolationis, qui consolatur nos in omni tribulatione nostrâ.
Deo gratias.
HYMNE.
Lucis Creator optime,
Lucem dierum proferens,
Primordiis lucis novæ,
Mundi parans originem.
Qui manè junctum vesperi
Diem vocari præcipis,
Tetrum chaos illabitur,
Audi preces cum fletibus.
Ne mens gravata crimine,
Vitæ sit exsul munere,
Dùm nil perenne cogitat,
Seseque culpis illigat.
Cœleste pulset ostium,
Vitale tollat præmium,
Vitemus omne noxium,
Purgemus omne pessimum
Præsta, Pater piissime,
Patrique compar Unice,
Cum Spiritu Paracleto,
Regnans per omne seculum.
Amen.