APPENDICE B.
La leggenda di Pilato, quale si ha nei racconti latini e nelle numerose versioni volgari, può tornare d'illustrazione alla leggenda della Vendetta di Cristo. Traggo il racconto che segue dal cod. L, II, 14 della Nazionale di Torino (a. 1311).
Ch'est ensi que Pylates fu engenrez.
N'est pas huiseus, ains fait bone oeure
Li troueres qui sa bouche oeuure
De bonne trouuere dire dire[837];
Chis qui bien trueue est plains d'ire
Quant il n'a de materre point. 5
Ma volente semont et point
Mon cuer a dire et de conter,
S'il est qui me vuelle escouter,
Vne mout meruillouse istoire,
Qui plaisans est et bele et voire. 10
Bien doit on oir et reprendre
Biaus mos, car on i puet aprendre
Sens et courtoisie en l'oir;
Du bien se doit on estoir
Li bon, car c'est drois et coustume, 15
Et li maluais en sont enfrume.
Vne estoire en roumans mis ai
Dont la materre moult prisai
Quant g'euc la verite veu:
Bien est raisons que soit seu, 20
Et dite[838] par rime et retraite,
Sans faussete et sans retraite,
Car faite est de droit essanplaire,
Cose est qui puet valoir et plaire,
Ains mais roumans en ceste terre 25
Ne fu ois de tel materre.
Tolens m'est pris que is tranlate
La vie de Bonce Pylate,
Dont on fait souuent mention
En quaresme en la passion. 30
Se dieus le me veut consentir
Ie vous cuic bien faire sentir
Le voir de se natiuithe,
Son pooir et sa dignithe;
En non qualoir ne lairai mie 35
Que maintenant ne vous en die.
Beneois soit qui m'escoutera,
Et qui va poi de pais fera.
Se vous me voles escouter
Aprendre i porres, sans douter, 40
Tel cose que ne seustes onques.
Or entende chascuns bien donques.
Tout estoient cha en arriere
Li roi sage et de grant maniere,
Et autre sergant terrien, 45
Et viel et ione et anchien
Volentiers metoient lors cures
A sauoir logique et natures,
Et par nature qu'il sauoient
Autres sciences conqueroient: 50
Li vns set de geometrie,
Et li autres d'astrenomie;
Plus goulousoient a sauoir
Asses que amasser auoir.
Venir voel a m'entention. 55
Peu deuant l'incarnation
Jhesucrist, si con lisant truis,
Fu en Ione vns rois instruis
En la science de clergie
Que on apele astrenomie; 60
Mout sot du cours du firmament,
Et des estoiles ensement;
A painnes ietoit onques sort
Que ne trouast de son acort.
Cis qui eut tant de sapience 65
Eut non Tirus rois de Maience;
En vn castel nouris et nee
Fu qui Berleis fu noumes;
Li pelerin de cest pais
Noument le castel Berleis. 70
Auint que vaust aler cacier
Pour soi deduire et souslacier:
Sen cheual commande a enseller,
Se maisnie fist apeller,
Ses leuriers, sa braquerie 75
En oubli ne vaust metre mie.
A la roine a pris congiet,
En l'estrier a boute le piet,
Sor le coursier maintenant monte;
Que vous feroie plus lonc conte? 80
Ie ne sai pourquoi ne coument
Tant cheuaucha il et sa gent
Que en le terre vint de Braibant,
Ou il voit vne forest grant,
Mais il n'i pot aler quachier 85
Pour lo solail qu'il voit coucier;
Trop tart estoit, pas ne cacha
Pour la nuit qui aprocha,
Maisement eust fait son preu,
Ia estoit entre kien et leu. 90
Bele nuit conmencha a faire,
Mout ot v ciel grant luminaire,
Bien estoit esteles li chius;
Cele part a iete ses ieus,
Entour resgarde et enuiron 95
Toute le constelation,
Pense que si ne trouuera
Qui grant mestire portera:
De l'estoile qu'il vit mesure
Prent et souspoise la nature, 100
Toute le disposition
Resgarde de la region,
Et l'escallette considere
De l'art du ciel et de la terre.
Quant ch'a fait si a esprouue, 105
Et par esperiment trouue,
Quiconques a feme gerroit
A celle eure vn enfant aroit
Qui aroit et deuroit aquerre
Mout grant signorie de terre, 110
Et aroit pooir de donner
Gens qui sont en isle de mer;
Cis qui dont engenres seroit
Sires de grant terre seroit.
Dont vausist sa femme tenir; 115
Mais n'i porroit a tans venir,
Trop s'estoit de li eslongies.
Quant voit chou si s'est herbergies.
Si tost com il fu osteles
Dont a ses serians apelles; 120
Asses amast mix q'il geust
A tel femme c'auoir peust
Qu'il perdist la grant signorie
Que peust auoir sa lignie.
Li sergant viennent maintenant: 125
«Ales», fait il, «ie vous conmant,
Vne femme si me querres,
Se che non mal venut seres,
Qui de biaute soit amiable,
Et qui a moi soit couuoitable, 130
Et s'elle n'est telle trouuee,
Vne autre m'en soit amenee».
Li seriant firrent maintenant
De lor signour tout son conmant
Au plus tost que il onques peurent, 135
Pres d'iaus par cha et par la keurent,
Tant tournerent et tant alerent
Que la pres vn manoir trouuerent.
Cis hom dont ie fas mention
Auoit Atus, ce truis, a non, 140
Et une fille auoit mout belle,
Pyle ot a non la damoiselle.
Li seriant, qui el ne queroient,
Sont esioi quant il le voient;
Celle fu amenee et prise, 145
Et ou lit auoec le roi mise.
La pucelle le roi rechut,
Et tant fist qu'elle conchut,
Et quant il ot fait a plente
De li toute sa vollente, 150
Se li pria que s'ensi fust
Que se de lui enfant eust,
Coique fust, marle v fumelle,
Qu'ele enuoiast au roi nouelle,
Qe pour riens nule ne laisast 155
Qe ele lui li enuoiast,
Et elle li ot en couuenent
Qu'elle feroit a son tollent.
Atant li rois a pris congiet,
S'a la damoiselle laissiet, 160
Rales s'en est en sa contree,
Et celle est grosse demouree;
Tant le porta que raisons porte
Qe vne femme vn enfant porte;
Li tans vint qu'enfanter deut, 165
Elle enfanta, vn enfant eut,
Qui fu biaus de si grant biaute
Con il a afiert a roiauthe.
[Py]le, qui fu de l'enfant mere,
Ot oublie le non son pere; 170
[E]ncor deust bien par raison
[L]i fius du pere auoir a non;
[M]ais pour che que ne le sot pas
[S]e li donna isnelle pas
Son non et le son pere Atus; 175
Pour ce ot non Pylatus.
Mout fu biaus enfes et plaisans:
Sa mere le garda .III. ans:
Que vous feroie lonc destint?
Adonques primes li souuint 180
De ce que li rois li ot dit
Quant de li ot fait son delit,
Que s'il aueuoit qu'elle eust
De lui aucun oir quesqu'il fust
Que pour riens nule ne laisast 185
Que ne li enuoiast.
Elle pensa que bon seroit,
Et qu'ele li enuoieroit.
Ensi pensa, ensi le fist,
Pylate a son pere tramist, 190
Dont fu Pylates enuoyes
A son pere qui en fu lies.
Quant il le voit son non enqiert,
Et on li dist que nomes iert
Pyla(l)te, ensi ot a non 195
De par sa mere et son taion.
Li rois auoit .I. fil mout cier
Qui fu de sa france moullier,
O lui mist Pylate d'enfenche,
Pour norir furent mis ensenble; 200
Anques estoient d'vn eage,
Mais n'estoient pas d'un linage.
Li tans passa de lor enfanche,
Et quant vinrent a connissance,
Et qu'il eurent discresion, 205
Peu ot en aus d'afection,
Ne se finoient de conbatre,
L'uns se penoit de l'autre abatre;
Quant a la luite se prendoient
Mout durement se conbatoient; 210
Ne quedent aussi comme frere
Qui estoient de par le pere.
Tous tans ensanble s'en aloient;
A quelconques iu qu'il iouoient,
A le fonde ou a le platine[839], 215
Ades ot entr'iaus aatine.
Mais de la roine li fieus
De Pylate fu plus soutieus,
De tous ius passa gentillece,
Car il auoit double nobleche. 220
Quant il venoient au palestre,
C'est vns lieus v luit seut estre,
Plus legiers estoit et plus aates
Et plus fors que n'estoit Pylates;
A quelconqes iu qu'il venist 225
Pylate a lui ne se tenist.
Or ne pleut a Pylate mie,
Ancois en eut au cuer enuie,
Tous fu de mautalent espris,
Son frere a coiement souspris, 230
Com maluais pour ceste ocoison
Ocist son frere en traison.
Au roi en vinrent les nouuelles;
Sacies ne les tint pas a belles:
Quant ot oi conter l'afaire 235
De mautalent enprist a dire,
Son fil fist deuant lui venir,
Et comme maufaiteur tenir:
«Ton iugement,» fist il, «sarons».
Adont fist mander les barons 240
Et si lor conta le mesfait
Qe Pylates ses fieus ot fait,
Et cil mout s'en esmeruillerent,
Et ensanble se consillerent,
Et quant il furent consillie 245
Arriere au roi sont repairie,
Et furent tout de tel acort
Pylates ait deserui mort.
Quant li rois vit qu'il fu iugies
S'en fu encore plus iries: 250
Pensa que se chis est pendus
Que ses .II. fieus aroit perdus;
Apres vaurroit pis qu'enant,
Dont s'end ala ia repentant,
Son cuer au plus que pot maira, 255
A soi meismes repaira,
Ne vaust encontre son fil mie
Moutepliier sa felonnie;
Pensa que bien s'en vengeroit;
A Rome dist l'enuoieroit, 260
Et ne le traiteroit a mort,
Ne li feroit ne droit ne tort.
A Roume deuoit[840] tous les ans
Li rois Titus treuages grans,
Dont enuoia son fil en gages 265
Et en pleges pour les treuages;
Pylate a mort pas ne liura
Et del treu se deliura.
Quant Pylate paruint a Rome
Compagna soi a vn noble homme, 270
Qui Paginus auoit a non,
De son pere auoit le non,
Et ert chis fieus au roi de France,
Enuoiet l'ot pour l'aquintance
Li rois aussi de son treuage 275
Son fil en pleges et en gages.
A celui conpaignon tint
Pylates, oies qu'en auint.
Quant il vit que chis Paginus
Estoit mioldres de lui tenus, 280
Pour ce que plains ert de bonnes meurs,
Et plus dines d'auoir honneurs
Qu'il n'ert, et que ert en verite
Plus grans de lui en dinite,
S'en eut ausi comme viltance; 285
Mes comme il fist grant enfance
Coiement pour ceste raison
Ocist celui en traison.
Or fu seu par tout a Rome
Que Pylate ot mort itel homme; 290
Es Roumains n'ot que couroucier
Quant il oirent chou noncier;
De Pylate furent en doute
S'il aroit se deserte toute
Tele comme il ot deseruie, 295
V s'on li sauueroit sa vie,
V s'on porroit nule raison
Que on le tenist en prison,
V trouer c'on le laisast aler.
Dont conmencerent a parler 300
Aucun Roumain et li plus sage,
Et dient: «S'il vit lonc eage
Cis qui a son frere a mort mis
Et noblece nous a maumis,
Et il auoit par auenture 305
D'aucune gent iugier la cure
Qui fisent fier et enuieus,
Il est si fel et si crueus
Que contre aus se conbateroit
Et petit les deporteroit, 310
Et ensi porroit porfiter
En ses anemis deporter.
Dont bon seroit que il fust mis
Entre grant[841] plente d'anemis.
Tant a fait que ne deueroit viure; 315
S'en poiesmes estre deliure
Cascuns en deuroit estre lies.
En Pons ille soit enuoies:
On ne leur puet signor offrir
Qu'il vuellent deseur aus soufrir; 320
Nus juges n'i va ne arriue
Qui se il point sor aus estriue
Qu'il ne l'ameccent a le mort:
D'aus n'ara il autre deport.
S'il a en lui tant de vigeur 325
Qu'il les puist metre a sa dueur,
Et se tel maniere les maire
C'a sa cordelle les puist traire
Par si qu'il ait sor aus pooir,
Nous le poons moult bien voloir, 330
Et s'il ne puet, s'ait sa deserte,
Siens soit li gaains et la perte.»
Cil qui furent illuec venu
Le consel ont a bon tenu,
A ce consel chascuns s'acorde, 335
N'i a celui qui s'en descorde,
Lor afaire ont aparilliet,
Pylate ont a Pons enuoiet.
Or voit Pylate c'on l'emmaine,
Et que chou est cose certaine 340
Que sires doit estre et jugeres
De ces gens crueuses et fieres,
Et qu'il va droit en Pons en ille;
Grant paour a c'on ne l'escille,
Dont fu il en moult grant doute 345
De sa vie qui est courte;
Pensa que bien se garira,
Car humlement auant ira.
Il se teut, n'eut tolent de braire,
Et soufri chou c'on li veut faire, 350
N'ot tolent de trop estriuer,
A Pons le conuient ariuer,
Et quant il fu a Pons venus
Fu con lor sires receus.
Tant fist par dons et par promesses 355
C'apaisa ces gens felenesses,
Par flater et par losengier
Fist que furent en son dangier;
Ensi les prist au premerain,
Et quant ce vint au daarain, 360
Si les mena mout malement
Par manaces et par tourment;
En le fin lor fist moult de maus
Que chascuns estoit lies et baus
Qe peust qe seust deseruir 365
Par coi il peust seruir:
Et pour ichou qe par son sens
Mist a point ces desperses gens,
Et les mist en subiection,
Ot il de Pons Ponces a non: 370
Puis que iuges fu de Pons isle,
Et que se mere ot a non Pyle,
Et ses taions fu nomes Ates,
Pour ce ot non Ponces Pylates;
Pour ce que les gens a point mist, 375
De Pons ille le sornon prist.
Dont en corut la renomee
En le terre de Galilee,
En Iherusalem et en Iude
Con Pylate les ot mene; 380
Auoit Pylate bien tenu
Icele gent que illa fu;
Par sons sens et par sa boisdie
Auoit mainte gent cunciie.
Con Pylates sages hom fu 385
Par le pais reuelle fu,
Herodes la nouelle en oi,
Cis qui fu fiex Archelei.
Li grans Herodes, ce sauons,
Fu a cel Herode taions 390
Duquel nous faisons mention.
Con princes, domination
Ot en cel tans en la contree
De Iherusalem de Iudee.
Quant la nouuelle dire oi 395
Mout durement s'en esioi,
Pour ce que fu de sens si grans
Fu de traire a lui mout engrans,
Se feste fait do son parler,
Dist qu'il veut veir le baceler. 400
Le trekeur aimme li trekieres,
Et le flateur li losengeres;
Chascuns hom aimme, ce me sanble,
Celui qui mieus a lui resanble.
Herodes vaust a son conseil 405
Pylate traire a son pareil,
Et pour che qu'i[l] le vaust auoir,
Mout li tramist de son auoir,
Son mes aler a lui commande
Et qu'il vingne a lui, et li mande, 410
S'a lui vient s'ara grant partie
Du sien et de sa signourie,
Pooir ara sor la contree
De Iherusalem et de Iudee.
Pylates vint, Herode fist 415
Chou que a Pylate pourmist.
Quant il fu sires du pais
Ne fu mie trop esbahis
De querre deniers a plente;
Il en ot a sa uolente; 420
Et quant ases en ot aquis,
En Rome en ala, s'a requis
Son signor Cesare et Tybere,
Qui a cel tans fu emperere,
Qu'il ait, si li vient a tolent, 425
Le cite de Iherusalent,
Et de Iudee ausi li prie
Qu'il li doinst la signourie:
Pour ce vaust il illuec venir
Qui le voloit de lui tenir. 430
L'empereres pour les deniers
Qu'il en eut le fist volentiers,
Tant en fist Pylate donner
Qu'il eurent asses a nonbrer.
Adont ne sot Herodes mie 435
De Pylate la trequerie,
Et que tenist mie d'autrui
Telle dinite que de lui,
Dusques adont qu'a Roume vint,
Et quant il le sot il se tint 440
Acunchiies trop durement
Quant ne l'ot de son tenement.
Sitost con vit qu'i[l] l'ot trai
Con son anemi le hai:
Ce fu li cause de l'orine 445
Dont entr'aus .II. fu li haine
De coi on fait le ramenbrance,
Si con saues, en la souffrance.
Entr'iaus .II. ot tous iors estris
Dusques adont que Ihesucris 450
Fu de par Pylate enuoiies
A Herode qui fu lies.
Menes i fu vilainnement,
Et ot de poupre un vestement.
A Herode le fist liurer 455
Pylate pour lui deliurer,
Pour ce qu'il voloit soi purgier
De son sanc li fist enuoiier.
Herodes pensoit tout autrement,
Car il cuidoit tout vraiement 460
Qu'i[l] li eust enuoiie celui
Pour la reuerence de lui,
Et qu'i[l] li vausist honneur faire,
Et pour ce qu'i[l] le deust faire.
Ensi Herodes l'entendi, 465
Et pour ce s'amour li rendi,
A lui se reconchilia,
Et Ihesucris li enuoia,
Dont li souffrance nous recorde
Que pour Ihesucrist vint acorde. 470
Mout fu Ihesucris demenes,
A Pilate fu ramenes,
Qui satifation vaust faire,
Pour ce qu'il vaust as Iuis plaire,
Et Ihesus gabes et batus, 475
Et puis lor rendi Pylatus,
As mauuais Iuis fu baillies
Pour ce qu'il fust crucefiies.
De se mort, de se passion,
Ne ferai mie mention; 480
Conment il morut cesques
Asses de fois oit l'aues.