[Als dan liderlich] meister hie aufgenummen sein auf dem hantwerck der decker piß her, die den morter nit gewist haben zu bereiten und die dach in der gemein ubel gedeckt und verwarlost haben, als sie dan des hantwerx nit noch nottorft gelernt oder gekunt haben, auch die meister etlich untüglich knecht von irs eigen nucz wegen dorzu gepraucht haben, dordurch den leuten ir zimer und heuser verdorben und erfault sein: und dorumb so hat ein erberer rat geseczt, das hinfür keiner zu meister sol auf genumen werden, er hab dan das hantwerck beweist und bewert vor 2 meisteren des selben hantwerk, die man dorumb verhoren sol vor den herrn auf den eit, das derselb, der meister wol werden, das hantwerck genüglichen kunn und dem wiß vor zu sein noch nottorft.
So hat ein erber rat geseczt, das die meister keinen knecht auf die decher sullen stellen zu decken, er hab dan vor dreu jar morter gerürt. auch so sullen dieselben knecht geloben alle jar, so die meister sweren zu sant Walpurgen tag [1 Mai], das sie den leuten wollen getrewlichen arbeiten und von der stat nit wollen ziehen dan mit eins pürgermeisters laub.
Dozu hat ein erber rat geseczt, welcher meister oder knecht in den vorgemelten geseczen fürprocht wirt, der dorinnen geprochen und nit gehalten het, der sol auf das haus zu puß geben [2 pfunt novi ungnade.]
[190a] Diese zwei stuck gehorent dem pfenter zu.
Und ein ratte soll alle vierteil jars leut von rats wegen geben, die solich meister und ir gesellen zu verhoren besenden, ob sie solich gesetze überfaren oder gehalten haben, und darnach der puß nachgeen als sich gepuret und recht ist.
Auch welich meister und gesellen solich gesetze überfaren hetten, das dieselben die pauherren oder ir gewalt, den sie solich pewe gethan hetten, auch melden sollen, dieselben auch zu verhoren besenden und furpaß der puß gegen ine nachgeen als sich gepuret und recht ist.
[190b] [Von ettlichen gesetzen der gepewe halben im statbuch begriffen.]
Es ist auch gesetzt, das einer den andern befriden soll in der stat wo einer eingeet zu der rechten hant, und ob einer an den andern gestossen hat überzwerch, das sullen sie mit einander befriden; und außwendig der stat sol einer den andern befriden velds halben, als in dem statbuch steet folio 156.
Es soll auch ein ieglicher man den anderen befriden in der stat als hoch ir peder aigen geen.