den kocher zuo dem swerte ‖ schier er umbe gebant.
Dô zugen si diu kleider ‖ von dem lîbe dan:
in zwein wîzen hemden ‖ sach man si beide stân.
sam zwei wildiu pantel ‖ si liefen durch den klê:
doch sach man bî dem brunnen ‖ den küenen Sîfriden ê.
Den brîs von allen dingen ‖ truoc er vor manegem man.
daz swert lôst er schiere, ‖ den kocher leit er dan, 10
den starken gêr er leinde ‖ an der linden ast:
bî des brunnen fluzze ‖ stuont der hêrlîche gast.
Die Sîfrides tugende ‖ wâren harte grôz.