ze wette zuo dem brunnen. ‖ sô daz ist getân,
man jehe dem gewinnes ‖ den man siht gewunnen hân.’
‘Nu welle ouch wirz versuochen,’ ‖ sprach Hagne der degen.
dô sprach der starke Sîfrit ‖ ‘sô wil ich mich legen
für iuwer füeze ‖ nider an daz gras.’
dô er daz gehôrte, ‖ wie liep daz Gunthêre was!
Dô sprach der degen küene ‖ ‘ich wil iu mêre sagen,
allez mîn gewæte ‖ wil ich mit mir tragen,
den gêr zuo dem schilde, ‖ und mîn pirsgewant.’