dô wart von degnen ‖ Hagne gevrâget genuoc.
Dô sprach er lougenlîche ‖ ‘dâ ich daz schif vant,
bî einer wilden wîden, ‖ dâ lôstez mîn hant.
ich hân deheinen vergen ‖ hiute hie gesehen:
ez ist ouch niemen leide ‖ von mînen schulden geschehen.’
Dô sprach von Burgonden ‖ der hêrre Gêrnôt
‘hiute muoz ich sorgen ‖ ûf lieber vriunde tôt,
sît wir der schifliute ‖ niht bereit hân,
wie wir komen übere. ‖ des muoz ich trûric gestân.’