In gótes gibotes súazi ‖ laz gángan thine fúazi,
ni laz thir zít thes ingán: ‖ theist sconi férs sar gidán;
Díhtọ io thaz zi nóti ‖ theso séhs ziti,
thaz thú thih so girústes, ‖ in theru síbuntun giréstes.
Thaz krístes wort uns ságetun ‖ joh drúta sine uns zélitun—
bifora lázu ih iz ál, ‖ so ịh bi réhtemen scal;
Wánta sie iz gisúngun ‖ hárto in édilzungun,
mit góte iz allaz ríatun, ‖ in wérkon ouh gizíartun.
Theist súazi joh ouh núzzi ‖ inti lérit unsih wízzi,
hímilis gimácha, ‖ bi thiu ist thaz ánder racha.