Ziu sculun Fránkon, so ih quád, ‖ zi thiu eínen wesan úngimah,
thie líutes wiht ni duáltun, ‖ thie wir hiar óba zaltun?
Sie sint so sáma chuani, ‖ sélb so thie Románi;
ni thárf man thaz ouh rédinon, ‖ thaz Kríachi in thes giwídaron. 10
Sie eígun in zi núzzi ‖ so sámalicho wízzi,
in félde joh in wálde ‖ so sint sie sáma balde;
Ríhiduam ginúagi ‖ joh sint ouh fílu kuani,
zi wáfane snelle ‖ so sínt thie théganạ alle.
Sie búent mit gizíugon ‖ (joh warun io thes giwón)
in gúatemo lánte; ‖ bi thíu sint sịẹ únscante.