Iz ist fílu feizit, ‖ hárto ist iz giwéizit
mit mánagfalten éhtin; ‖ níst iz bi unsen fréhtin.
Zi núzze grébit man ouh thár ‖ ér inti kúphar,
joh bi thía meina ‖ ísine steina;
Ouh thárazua fúagi ‖ sílabar ginúagi,
joh lésent thar in lánte ‖ góld in iro sante.
Sie sint fástmuate ‖ zi mánagemo guate,
zi mánageru núzzi; ‖ thaz dúent in iro wízzi.
Sie sint fílu redie ‖ sih fíanton zirrettinne;
ni gidúrrun sies bigínnan, ‖ sie eígun se ubarwúnnan. 10