Líut sih in nintfúarit, ‖ thaz iro lánt ruarit,
ni sie bị íro gúati ‖ in thíonon io zi noti;
Joh ménnisgon álle, ‖ ther sé iz ni untarfálle,
(ih weiz, iz gót worahta) ‖ al éigun se iro forahta.
Nist líut, thaz es bigínne, ‖ thaz widar in ringe;
in éigun sie iz firméinit, ‖ mit wáfanon gizéinit.
Sie lértun sịẹ iz mit swérton, ‖ nálas mit then wórton,
mit spéron filu wásso; ‖ bi thiu fórahten sie se nóh so.
Ni si thíot, thaz thes gidráhte, ‖ in thiu iz mit ín fehte,
thoh Médị iz sin joh Pérsi, ‖ núb in es thiu wírs si.