Lás ih iu in alawár ‖ in einen búachon (ih weiz wár),
sie in síbbu joh in áhtu ‖ sin Alexándres slahtu,
Ther wórolti so githréwita, ‖ mit suértu siạ al gistréwita
úntar sinen hánton ‖ mit fílu herten bánton;
Joh fánd in theru rédinu, ‖ tház fon Macedóniu
ther líut in gibúrti ‖ giscéidiner wúrti. 10
Nist untar ín, thaz thúlte, ‖ thaz kúning iro wálte,
in wórolti nihéine, ‖ ni si thíe sie zugun héime;
Odo in érdringe ‖ ánder thes bigínne
in thihéinigemo thíete, ‖ thaz ubar síe gibíete.