Thes éigun sie io núzzi ‖ in snélli joh in wízzi;
nị intrátent sie nihéinan, ‖ unz sẹ ínan eigun héilan.
Er ist gizál ubar ál, ‖ io so édilthegan skál,
wíser inti kúani; ‖ thero éigun sie ío ginúagi.
Wéltit er githíuto ‖ mánagero líuto,
joh zíuhit er se réine ‖ selb so síne heime.
Ni sínt, thie ímo ouh derien, ‖ in thiu nan Fránkon werien;
thie snélli sine irbiten, ‖ thaz síe nan umbiriten.
Wanta állaz, thaz sies thénkent, ‖ sie ịz al mit góte wirkent;
ni dúent sies wíht in noti ‖ ána sin girati.