Sie sint gótes worto ‖ flízig filu hárto,
tház sie thaz gilérnen, ‖ thaz in thia búah zellen; 10
Tház sie thes bigínnen, ‖ iz úzana gisíngen,
joh síe iz ouh irfúllen ‖ mit míhilemo willen.
Gidán ist es nu rédina, ‖ thaz sie sint gúate thegana,
ouh góte thionontị álle ‖ joh wísduames folle.
Nu will ih scríban unser héil, ‖ evangéliono deil,
so wír nu hiar bigúnnun, ‖ in frénkisga zungun;
Thaz síe ni wesen éino ‖ thes selben ádeilo,
ni man in íro gizungi ‖ Kristes lób sungi;