Joh er ouh íro worto ‖ gilóbot werde hárto,
ther sie zímo holeta, ‖ zi gilóubon sinen ládota.
Ist ther in íro lante ‖ iz álleswio nintstánte,
in ánder gizúngi ‖ firnéman iz ni kúnni:
Hiar hor er ío zi gúate, ‖ waz gót imo gibíete,
thaz wír imo hiar gisúngun ‖ in frénkisga zúngun.
Nu fréwen sih es álle, ‖ so wer so wóla wolle,
joh so wér si hold in múate ‖ Fránkono thíote, 10
Thaz wir Kríste sungun ‖ in únsera zungun,
joh wír ouh thaz gilébetun, ‖ in frénkisgon nan lóbotun!