ih meg iz lóbon harto, ‖ ni girínnit mih thero wórto.
Thóh mir megi lídolih ‖ sprechan wórtogilíh,
ni mag ih thóh mit worte ‖ thes lóbes queman zị énte.
Ni bist es ío giloubo: ‖ sélbo thu ịz ni scówo;
ni mahtu ịz óuh noh thanne ‖ yrzellen íomanne.
Thar ist líb ana tód, ‖ líoht ana finstri,
éngilichaz kúnni, ‖ joh éwinigo wúnni.
Wir éigun iz firlázan; ‖ thaz mugun wir ío riazan
joh zen ínheimon ‖ io émmizigen wéinon. 10
Wir fúarun thanana nóti ‖ thuruh úbarmuati,