[35] de Baas: das Beste.
[A] Na langen vergiiflicken Wreesken[B] heww' ick endlick uut e funnen, dat »Giiwelspett« 'n Schriiffehler is, statts dessen et »Kniwelspett«[C] heeten mot, dat 'n Jedder wual sachte kinnen schall.
[B] Wreesken: Forschen.
[C] Kniiwel: Knebel. Kniiwelspett: die Knebelstange; der Drehstock.
☞ Herrn Professor Kosegarten zu Erledigung der Anfrage und beliebiger Berücksichtigung in dessen allgemeinen Wörterbuche der plattdeutschen Sprache.
[D] Sündflut; richtiger Sindflut; d. h. große Flut.
Seste Breef.
Daar bin 'k nu na ens. Ji Wiisepint[1] tämden Ju[2] lesten, as wann Ji de Wiisheet alle alleine schluaken harren, un wollen mi wisse wual up'n Tant föölen, af ick den Unnerscheed tüsken Fospern[3] un Truaen[4] wual wüste. Daar menden Ji mi wual 'n rechten Damp met antodoonen, un 'ne Luus unner'n Prüück to setten, dann Ji belden Ju wual in: dat miine Gäuse sau wiet nich n göngen; man dat fällt weg as den Kapziener de Haarbüül. Söcke Knuäkskes kann 'k na wual sachte begnaagen[5] un daar verspee[6] Ji mi vorwahr na nich miie. Ick harr'r Ju auck faarts wual up deenen wollt, wann 'r us nich jüst wat tüsken kuomen wööre, dat wi datomaulen den Verwank nich kriigen konnen, dat wi'r met to Gange kweimen. Dat ick 't alldach wual weet, will 'k Ju dann allnu beliikteeken[7].
De Fospern sind de Footspuuren van hännigen[8] Deerden, de met blauten Fööten, oder as de Landmann seggt »baarf'sk«[9] loopet; t. B. Kreggensfospern, Haasenfospern etc. — Truaen deerentiigen sind de Stappen van grauten Schepsels[10] aparte van söcken de 'r wat an'n Fööten hebbet; t. B. Pierdetruaen, (me seggt auck wual es statts dessen Pierdehööwe) Kohtruaen — dann de Kögge hebbt je auck Footwierk anne, dat'n antleste de Schlächters uuttrecket. — Wann 'n Minske baarf'sk geht, seggt me iewenwual Fospern; t. B. siine Fospern nau to rieken, de ick in'n Schneie nauspüürt hebbe, schal he wual to Bierge in mashakket[11] sien. Het 'n Minske abers Footwierk anne, dann seggt me Truaen: t. B. Holsketruaen. (Ick gläuwe du hest diine Holskeklaunen[12] verluaren, dat seh 'k an de Truaen.) Süss heetet auck de Spuuren de de Waagenriäer achtet sick lautet, »Waagentruaen.« Man de Trette van Gäusen un Iänden heetet »Pattken« Gäuse- of Iände-Pattken. Wat segge Ji nu? Mi ducht Ji schiölt wual begriipen miöten, dat Ji daar aparte 'ne aule Ratten up 't Speck buunen harren. Wi küüret na wual es bett to haupe, dann will wi mehr van söckes wat naasken, man dann schall't Ju auck duwwelt wier ümmekuomen, dat Ji Ju alldach wat verniggen[13] schiölet, dann miine Müüse wietet vorwahr na mehr Läcker as eene un ick weet na'n heelen Bras[14] van de Aart Uutdrücke, daar schwaare Wiisen up gahet, de de Duusendste nich n weet, un ick will Ju auck wual wicken, dat Ji'r wat anne to knuustern[15] kriigen schiölet.
Sin Ji auk wual es in Haagen wiesen, of he Ji wual es 'n Buuren uut'n Kaspel Haagen küüren häärt? De hebbt 'ne ganz andre Uutsprauke as wi Beeden un as andre Lüüe.