Schultheis, burgermaister und rate zu Poxberg.
Vff solche handlung vnd der von Poxberg schreiben haben die kriegsräte am suntag ganz frü herr Rudolffen von Ehingen, Ritter, haubtmann, Jacoben von Wernau vnd den zeugmaister Matern Herder mit hundert pferden, auch einem zimlichen geschütz gen Poxberg geschickt vnd daſselb haus ernstlich erfordern vnd einnemen laſsen, wie dann solchs on allen widerstanndt v̈bergeben vnd zu des punds handen vnd gewalt alsbald gestellt worden ist.
Vnd alls im selben schloſs Poxberg an treffenlichen geschütz, alls quartonen, notschlangen, valckonetlin, zentner- vnd sunst hackenpüxen in mercklicher antzal, datzu kugl, pulfer vnd annder munition, auch wein, melb, getraid, flaisch, saltz vnd in allem dem, so in ein besetzung gehört, aller vorrat gefunden, haben die kriegsräte obgemelten suntag Albani geordent, das geschütz sambt seiner zugehör von dem schloſs Poxberg an peſsere gewarsam zufüren vnd gemainem bundt zu gueten zubehalten. Das ist beschehen vnd also denselben suntag vnd montag biſs vff den mittag volbracht vnd das geschütz gen Bischoffshaim gefürt.
Inuentarium des geschütz vnd vorrats, so zu Poxberg im schloſs erobert vnd gefunden ist: Erstlich ein quarttaun, 36 cenntner schwer, scheuſst eysen 36 pfundt; ein schlanngen steet doneben, vngeuerlich 26 zentner schwer, scheuſst eysen 6 pfundt; ein stainpüxen vff einem stockh, ungeuerlich zwaintzig zentner schwer; zwey valckonet, ains vff 4 zentner schwer; ein quarttaun vff einem schirmer, vngeuerlich vff 30 zentner schwer; ein schlanngen, vngeuerlich 18 Zentner schwer; im hintern thurn ein schlenglein, mit 4 redern; item mer ein schlenglein in der were zu einem groſsen stuckh, wigt 2½ zentner; item 8 eiseren hacken; item 4 scharpfetin, wigt eins 1 zentner; item in der groſsen stuben 20 neue hacken vnd neu eingefaſst, zu halben zentnern; item 4 alt gefaſst hacken; item 2 alt vngefaſst hacken; vornen im hoff ein pockh; im hintern thurm zuoberst ein toppelhacken, mer 3 hacken, item mer 2 hacken; item in der werh, zum stockh genannt, ein centnerhacken, item mer vier halb centnerhacken, item mer 2 halb centnerhacken, item zwo eysen feuerpüxen; item im püxenhaus 1 centnerhacken, item zehen eysere hacken; item vff dem casten ein centnerhacken, item zway scharpfetin, wigt ains ain centner, item 2 halb centnerhacken; vnten bey dem hintern keller 3 halb centnerhacken; item in der hintern gefengknus bey 22 centner pulffers vngeuerlich item 3 centner pley; item in einer keskamer in einem sackh ein centner pulffers; item mer in einem gewelb, do zwen stockh inn gestanden, in vier casten bey 40 malter melbs, item 23 scheuben saltz, item 13 feurgabel mit feuerwerckh; item 24 feuerhäfen; 161 quartaunenkugel, eisen; item 365 schlangenkugel, eisen, zweyer gattung; item 132 valckonetkugel, plei; item 121 scharpfetinkugel, plei; mer zwo alt hackenpüxen; item zwo eisere schrauben, domit man prucken aufschraubt.
Vnd alls sich aber die kriegsräte besorgeten, wie dann ettliche kuntschafften in das veltleger komen sindt, das sich pfaltzgraf Ludwig, churfürst &c., sollte erhebt vnd vorhaben, mit Poxberg alls noch seinem lehen vnd aigenthum vnterhaspel zumachen, das daſselb schloſs vermög der bundsräte beuelh vnd instruction nit verprennt vnd zerbrochen wurde, haben darumb die kriegsräte mit ausprennung vnd zerreiſsung derselben pasteien vnd schloſs Poxberg desto serer geeylt vnd nit souil zeit genomen, das das getraid, melb vnd wein, das, wie vorgemelt, in mercklicher antzal verhannden was, auſs dem schloſs alles gebracht werden mögen, sunder den armen leuten vſs dem stettlein vnd den dorfern erlaubt, das melb vnd getraid zu irem nutz herauszutragen, vnd nit lanng darnach durch die püxenmaistere das schloſs mit pulffer, holtz vnd stro spicken, antzünden vnd verprennen laſsen, dobey dann Herr Jorg Truchsas, veldthaubtman, sambt andern kriegsräten gehalten vnd zugesehen haben. Mittler weyl diser geschichten ist das heer zu roſs vnd fues sambt der artolerey vor Lauda[A] im veld still gelegen vnd hat vff volenndung diser hanndlung gewarttet.
Es haben auch nachmals gemaine bundtsstennde das schloſs Poxberg mit aller seiner zugehör vnd nutzung, auch mit allerlay beschwerden, alls dann noch vil Rosenberger vnd ir Schwestern an bemeltem schloſs alls vnschuldig personen tail gehabt vnd darvff vnd seiner zugehör verweist vnd noch vnendtricht gewest &c., phaltzgrafe Ludwigen churfürsten vmb fünfftausent gulden verkaufft, zugestellt vnd vberantwort, sunderlich auch in ansehung, das gedachter pfaltzgraf Ludwig, churfürst, sambt andern pfaltzgrauen, seiner gnaden gebrudere, diser zeit bundsuerwanndte fürsten worden sindt.
Wachbach vnd Aschhausen betreffendt: Nachmals am mittwoch sanndt Johanns des taufers tag haben herr Jorg Truchsass vnd die kriegsrete zwen veindtsbriefe, ainen gen Wachbach, vnd den andern gen Aschhausen geschickt vnd alsbald verordnet den burgermaister von V̈berlingen mit zweyen vendlin knechten, dieselben zway schloſser Wachbach und Aschhausen zuerfordern, eintzunemen, auszuprennen vnd alle derselben zugehorennde paurn vnd gütere zu gemains punds hannden vnd gewalt zubringen, wie dann solchs on allen widerstanndt durch gemelten burgermaister von V̈berlingen volbracht vnd ausgericht. Vnd in denselben heusern ist weder von vorrat, geschütz noch annderm gar nichts gefunden, sunder zuuor alles geflohent worden.
Handlung gegen Balbach dem schloſs: Desgleichen ist den Donerstag nach Johanis Baptiste den achtzehenden tag des monats juny vſs beuelch herr Georgen Truchsassen alls oberstem veldthaubtman vnd der kriegsrete durch herr Wolffen Böhmer, meiner herrn eins erbern rats zu Nürnberg haubtman, ein veindtsbriefe durch einen knaben vnd seinen trummetter gen Balbach geschickt, die daſselb schlos erfordert, aber niemandt dann etlich edlfrauen vnd junckfrauen mit cleinen kindlein gefunden, die ob demselben veindtsbriefe seer erschrocken, sich cleglich gestellt, mit antzaig, das sy sich diser gewaltigen handlung nit versehen, vnd hetten zu Gott hoffnung, es solte vngerochen nit bleiben. Aber kurtz vnd des andern tags darnach hat gemelter Böhmer mit seinen vnd andern der stett reuttern daſselb schloſs Balbach durch ettlich fuesknecht spicken, antzünden vnd ausprennen laſsen, vnd deſselben zugehörende paurn vnd guetere zu gemains punds hannden angenomen. Das ist alles vngeachtet das die Bairischen reuter darob seer vnlustig vud vngestümb waren, vollenndet vnd ausgericht. In demselben schloſs sindt zwen tayl gewest, den Sützeln zusteend, vnd ein neugebaut haus im vorhof, das ist alles verprennt on einiche verschonung. Wiewol die frauen vnd ander im schloſs sambt den Bairischen reutern, so allda ir losament gehabt, alles getafel vnd holtzwerckh vſs den stuben vnd gemachen des schloſs geprochen hetten, ist doch daſselb schloſs mit holtz vnd stroh dermas gespickt gewest vnd verordent, das ir fürnemen nit geholfen, sunnder alles in grundt verprennt ist.
Verennderung des legers: Item freytags den neuntzehenden des monats juny ist das kriegsvolckh vor Lauda aufgebrochen vnd getzogen den negsten vff Grünsfeldt, vnd dieselben nacht sich bey Mos, ein dorf vngeuerlich zwo meil wegs von Wirtzburg nidergethan vnd doselbst zwo nacht stillgelegen.
Den Reussenberg betreffendt: Mittler zeit deſselben legers haben herr Jörg Truchsas vnd die kriegsrete einen veindtsbrieffe vff das schloſs Reuſsenberg dem Hanns Jorgen von Thüngen zugeschickt. Vnd es ist auch die mainung gewest, das das kriegsvolckh solte für daſselbig schloſs Reuſsenberg geruckt sein, aber vff bitt vnd bewilligen des bischoffs zu Wirtzburg als einem bundsverwandten fürsten vergonnt, das die Thüngischen paurn, zu dem Reuſsenberg gehorend, an demselben schloſs den tayl, souil dem Hans Jorgen von Thüngen zugestannden, selbst abprechen, das holtzwerckh heraustragen vnd verprennen. dagegen soll denen andern von Thüngen vnd zuuorderst dem stifft Wirtzburg zu guetem das kriegsvolckh nit weitter in das stifft Wirtzburg noch v̈ber den Main gefürt werden.