Zu solchem abprechen ist von den kriegsräten verordent bey hundert pferden darob zuhalten, damit obgemelten erpieten genueg bescheh. Vnter denselben reutern sind auch etlich Nürmbergisch reuter von den erbern bürgern gewest, neben andern in dem Wirtzburgischen glait doselbsthin vnd widerumb zum hauffen gelangt, aber da ist, wie die gemain rede gewest, gar leis ganngen vnd nit vil schadens beschehen, wiewol sich zu diser handlung noch anderm fürnemen die freyen Francken irem pracht nach mit nichten zum widerstandt vernemen haben laſsen. Es haben sich auch die andern von Thüngen, so am Reuſsenberg tayl gehabt, gegen den bundsstenden purgirt vnd verschriben wie hernach volgt:
Wir nachbenannten mit namen Eustachius, Caspar und Jorg von Thüngen, gevettern, alls innhaber des schloſs Reuſsenbergs, bekennen offenlich vnd thun kunth allermeniglich mit disem brief, alls gemeine stennde des bunds zu Schwaben, vmb das Hanns Jörg von Thüngen, vnser vetter, ire veint vnd widerwerttigen vnd offne achter in dem gemelten vnserm schloſs enthalten haben soll, fürgenomen, darfürtzuziehen vnd dagegen mit straf zuhanndln, vnd wir vns aber deshalben zu iren gnaden vnd gunsten gefuegt vnd vff vnser entschuldigung erlanngt, das ir gnad vnd gunst vns gnediglich zu der purgation gelaſsen, das wir demnach iren gnaden vnd gunsten bey vnnsern gueten waren treuen zugesagt, geredt vnd versprochen haben, vnd thun das hiemit wiſsentlich in craft dits briefs, sobald ir gnad vnd gunst für daſselbig schloſs schicken vnd ordnen, daſs inen daſselbig zu stund von vns soll geoffendt vnd auffgetan werden, darjnnen mit des gedachten Hans Jörgen von Thüngen tayl mit zerreiſsen, verprennen oder in annder wege, deſsgleichen mit denen gütern, ime zugehörig, ires willens vnd gefallens zuhandln, das auch dartzu wir, vnser erben vnd nachkomen, solanng die ailfjarig ainigung des bunds zu Schwaben weret, mit der tat vnd auſserhalb rechts wider gemaine stennde des bunnds vnd derselbigen zugehörigen vnd verwandten nit sein, noch hanndln, noch die eegerürt zeit wider sy oder die iren zum Reuſsenberg niemands enthalten, hausen, hofen, etzen, trenncken oder darvſs einichen fürschub, wie der immer beschehen möcht, thun sollen noch wöllen, alles bey vorgemelter vnnser zugesagten treu, getreulich vnd vngeuerlich. Vnd des zu warem vrkunth hab ich eegenannter Eustachius von Thüngen von mein selbs vnd der obberürten Caspar vnd Jörgen von Thüngen, meiner zweyer vettern, bitt wegen mein aigen insigel zu gezeugnus offenlich an disen brief gehangen. Vnd dartzu haben wir all drey sambt vnd sunderlich mit vleis erpetten den edln vnd vesten Bernharten von Thüngen, vnnsern lieben bruder vnd vettern, das er sein aigen insigel, doch ime vnd seinen erben on schaden, auch offenlich hieran gehangen hat geprechenhalb diser zeit vnser obberürten Caspar vnd Jörgen von Thüngen aigen insigel. Geben vnd geschehen zu Mergethaim vff freytag nach sandt Veits tag nach Cristi vnsers lieben hern gepurt fünffzehenhundert vnd in dem dreyvndzwaintzigisten jare.
Das stettlein Aw[B] belangend: So ist gegen dem stettlein Au dermas gehanndlt, das durch den obersten veldthaubtman vnd die verordennten kriegsräte ein veindtsbriefe doselbsthin gen Au geschickt vnd daſselb stettlein, so zum halben tayl sambt einem schloſs dem Cuntz von Rosenberg, vnd der annder halb tayl dem bischoff von Wirtzburg zugestanden, zu hannden gemainer stennde des Schwäbischen bunds durch etliche raisige, dartzu verordent, erfordert vnd alle rennt, zins vnd gült, auch die paurn doselbsthin und dem Cuntz von Rosenberg zugehorend, zu gemains bunds hannden vnd gewalt gebracht, vnd des Cuntz von Rosenbergs hausfrauen, der dann ir widem darauff verweist gewest, nit mer dann ir varnus, clainotter vnd claider gelaſsen vnd daſselb halb stettlein Au vff ir vngehorsam vnd verwürckung dartzu vmb tausend gulden gepranntschatzt worden.
Gegen Waltmannshouen vnd Gnetza: Item montags den zwenundzwaintzigisten juny sind herr Jorg Truchsas, veldthaubtman, vnd das kriegsvolckh fort vff Vffenhaim geruckt, doselbt den Eritag stillgelegen, in derselben zeit zwen veindtsbrieff durch einen knaben gen Waltmanshouen vnd Gnetza, bede Cuntzen von Rosenberg zugehörig, geschickt vnd dieselben zway heuser sambt iren zugehörenden paurn vnd nutzungen erfordern laſsen. Aber in denselben heusern ist niemandt gefunden worden.
Vff solche handlung ist erstlich das schloſs Waltmanshouen, welchs dann gar geraumbt vnd ausgeleret gewest, durch den obersten veldthaubtman vnd andere haubtleute verprennt, die paurn auch in des bunds pflichten angenomen, mit der aufflage, dhweil sich dieselben paurn hieuor wider ir zusagen gegen herr Jorgen Truchsasen etwas vngepürlichs, vngehorsam vnd strafbar gehalten haben, also das sy die paurn plünderns oder zum wenigsten pranntschatzung wirdig gewest weren, das demnach die paurn zu einer straf gemainlich vnd ein yeder sunderlich, sunder ainicher were mit weiſsen steblein den negsten zu den bundsräten, so damals zu Hasfurt gewest, sich stellen, antzaigen, doselbst weiters beschaids vnd der gnade erwartten sollen.
Vnd alsbald ist auch durch Burkharten Marschalck von Pappenheim vnd ettlich der stett reuter das schloſs Gnetza, so gleichermas wie Waltmanshouen vnd etwas lustiger vnd vester gepaut gewest, verprennt vnd alle zugehorende gueter vnd paurn zu gemains bunds banden genomen vnd huldigen laſsen.
Zug vff das gebirg: Item mitwochs den 24. juny 1523 sindt die kriegsrete mit dem kriegsvolckh aufgeprochen, iren wege an der Aisch vff Windshaim, vff Lonerstatt vnd fortt vff Vorchhaim genomen, doselbst zwen tag stillgelegen, das geschütz vnd anders gepeſsert, auch alles geschos abschieſsen laſsen. In demselben schieſsen dann ettliche püchsenmaister, so ire sachen nit in acht gehabt, von einem ladstecken vnd einem veſslein pulfers schaden genomen.
Auch haben in derselben zeit die kriegsrete geratschlaget, welchen wege sy am bequemsten vff das gepirg nemen möchten, vnd derhalb beschloſsen, vff Ebermanstat vnd denselben grunt den negsten vff Streitberg die wege antzunemen, alsdann v̈ber die staig vff Holfeldt zuuerrucken. — Vnd alls solcher zug für Streitberg geschehen, ist es gleichwol von wegen der höhe der staig doselbst mit dem groſsen geschütz vnd der meng der wägen gar langsam zugangen, also das das rennfendlin, der vorzug, der gewaltig hauf vnd der nachzug des raisigen zeugs sambt ettlichen fuesknechten ein lange zeit vor Streitberg vff der hoh halten vnd vff die wagen, auch das geschütz warten müſsen. Vnd an der andern seyten des schloſs Streitberg ist das fuesvolkh mit dem geschütz vnd den wägen die staig aufwärts getzogen, vnter denen sich ettlich fuesknecht, so zum tayl vnter eins erbern rats zu Nürmberg vendlin gelegen vnd in dem nachzug verordent waren, vnterstanden, Herr Cunrat Schotten, damals haubtman vff Streitberg seine visch vnd vorhen vſs einem casten zuheben vnd etlich pfaben zuschieſsen. Darob dann herr Cunrat vnlustig vnd vnwillig vnd mit einer hackenpüxen vnter die knecht geschossen vnd alsbald einen Nürnbergischen fuesknecht gefangen, von den andern knechten, so nichts dartzu gethan, mit gewalt genomen vnd in das schloſs gefürt, der mainung, denselben zuhencken, vnd alsbald in einem stockh dermaſsen etlich stund ligen laſsen, das demselben knecht löcher in die arm geriſsen, die ime nachmals vber ettlich lange zeit nit gehailet sind.
Alls aber eins erbern rats diser statt haubtman, Wolff Böhmer, solche gewaltat erfaren, hat er sich mit ettlichen Nürnbergischen haubtleuten, fenndrichen vnd andern zu herr Jorgen Truchsasen vnd den kriegsräten gefueget, dise gewaltat vnd den fridbruch angetzaiget. Dem ist annders nit geholffen dann das Clas Seidensticker, profos, zu herr Cunraten reitten vnd den knecht zu seinen handen nemen soll. Das ist beschehen.
Truppach vnd Krügelstein die schlosser auf dem gebirg betreffend: Nachmals vnd nemlich mittwochs den ersten tag des monats july haben herr Jorg Truchsäs alls oberster veldthaubtman vnd die kriegsräte einen knaben mit zweien veinds brieuen gen Truppach, das des Wolff Heinrich von Aufses gewest, vnd Krügelstain, so Jorg Wolff von Gich zugestannden, geschickt, auch nachmals dieselben zway schloſser, so dann gantz öde vnd verlaſsen, geraumbt gefunden worden, sambt iren zugehörungen, alls paurn vnd ander nutzung, einnemen, gemainem bundt huldigen vnd aide thun, darnach daſselbig schloſs Truppach sambt den vorgepeuen im vorhof antzünden vnd verprennen laſsen.