‚Und dâ er mîne minne sô rîterlîch gewan, 764
dô jach Sîvrit, er wære sküneges man:
des hân ich in vür eigen, sît ich ins hôrte jehen.‘
dô sprach diu schœne Kriemhilt: ‚sô wær mir übele geschehen.
‚Wie heten sô geworben die edelen bruoder mîn, 765
daß ich eigenmannes wine solde sîn?
des wil ich dich, Prünhilt, vil vriuntlîchen biten,
daß du die rede lâßest durch mich mit güetlîchen siten.‘
‚Ich mag ir niht gelâßen,‘ sprach des küneges wîp: 766
‚zwiu sold ich verkiesen sô maneges rîters lîp,