und alsô bœsiu mære von dem sune mîn,
daß ir saget ieman, daß er sî erslagen,
wan ich enkunde in nimmer unz an mîn ende verklagen.‘
‚Und welt irß niht gelouben, daß ir mich hœret sagen, 961
sô vernemet selbe Kriemhilde klagen
und alleß ir gesinde den Sîvrides tôt.‘
vil sêre schrac dô Sigmunt: des gie im wærlîchen nôt.
Mit hundert sîner manne er von dem bette spranc. 962
si zucten zuo den handen diu scharphen wâfen lanc:
si liefen zuo dem wuofe jâmerlîchen dan.