daß erslagen wære   Blœdel und sîne man;

daß hete Hagenen bruoder   mit den knehten getân.

Ê eß der künec ervünde,   die Hiunen durch ir haß, 1871

der garten sich zwei tûsent   oder dannoch baß.

si giengen zuo den knehten,   daß muos et alsô wesen,

und ließen des gesindes   ninder einen genesen.

Die ungetriuwen brâhten   vürß hûs ein michel her. 1872

die ellenden knehte   stuonden wol ze wer.

waß half ir baldeß ellen?   si muosen ligen tôt;

dar nâch in kurzen stunden   sich huop ein vreislîcher nôt.