49. Wo is Jemand, de dar leven deiht un den Dod nich süht? De sin Seel retten deiht vun de Gewalt vun dat Graf.

50. HErr, wo is Din vörrige Gnad, de Du David toswaren hest in Din Wahrheit? Ps. [85, 2.]

51. Denk, HErr, an Din Knecht ehr Smach, de ik in min Schoot drägen doh, vun so veele Völker.

52. Darmit Di, HErr, Dine Fiende slecht maken doht, darmit se slecht makt de Fotsporen vun Din Gesalvten.

53. Gelavet si de HErr ewiglich! Amen! Amen! Ps. [40, 17.]

De 90. Psalm.

1. En Gebet vun den Mann Gottes, Moses.

2. HErr GOtt, Du büst uns’ Toflucht för immer. Eh denn de Bargen warn un de Eer un de Welt schaffen warn, büst Du, GOtt, vun Ewigkeit to Ewigkeit! Spr. 8, 25. Jes. 43, 13.

3. De Du de Minschen letst starven un sprickst: Kamt wedder, Minschenkinner!

4. Denn dusend Jahr sünd vör Di as en Dag, de güstern vergahn is un as en Nachtwach!