A Chronicle of London from 1089 to 1483 / Written in the Fifteenth Century, and for the First Time Printed from MSS. in the British Museum

by Anonymous

NOMINA COSTODUM TEMPORE REGIS JOH’IS QUI CORONATUS FUIT APUD WESTM’ IN DIE ASCENSIONIS D’NI, ANNO Ml’ Cmo NONAGESIMO NONO.

TEMPORE REG’ JOH’IS. [1199-1200.]

[Custodes.]—	Arnold Fitz Arnulf.	Anno primo.
	Ric’us Fitz Berthi.

In this yere kyng John loste all Normandye and Angoye be werre; and he toke of every plowe lond in Engelond iiis. toward hise werres.

TEMPORE REG’ JOH’IS. [1200-1203.]

[Custodes.]—	Roger Desert.	Anno s’c’do.
	Jacob’ Fitz Barthi.

Parlement at Londoun.

This yere the kyng held his parlement at Londone, and asked of the clergye the stynte of every chirche in Engelond for to conquere ayen Normandye and Angoye. And in this yere deyde Huberd erchebisshop of Caunterbury; and thanne the priour and the covent of Caunterbury chosen in there chapytre hous the noble clerk Stephen of Langeton, ayens the kynges will, whome the pope sacred at Viterke. S’cus Hugo de Lincoln isto anno monebat’. And this yere deide seynt Hughe of Lincoln; also the erchebysshopp of Caunterbury; and the priour of Cricherche, and all the monkes weren exiled.

[Custodes.]—	William Fitz Alice.	Anno tercio.
	Simon de Aldermanb’y.

This same yere, be the avyse of wyse men of the citee of London that were chosene xxxv men whiche were sworne to holde and mayntene with the maire the assyses.