Nosse modum iuris sed in hoc tamen utilis aevo,
Cui non ulla fuit iusti reverentia; salva
Libertate potens, et solus plebe parata
Privatus servire sibi, rectorque senatus,
Sed regnantis, erat. Nil belli iure poposcit,
Quaeque dari voluit, voluit sibi posse negari.
Immodicas possedit opes, sed plura retentis
Intulit: invasit ferrum, sed ponere norat;
Praetulit arma togae, sed pacem armatus amavit;
Iuvit sumpta ducem, iuvit dimissa potestas.