Item, That nane be admittit unto the classe of the Lawis, but he that shall have sufficient testimoniallis of his tyme weill spent in Dialecticque, Mathematique, Phisique, Ethick, Œconomiques, and Pollitiques, and of his docilitie in the last.
Item, That nane be admittit unto the classe and seige of Divines[474] bot he that shall have sufficient testimonialles of his tyme weill spent in Dialecticque, Mathematicque, Phisique, Ethique, Œconomique, Morall Philosophie,[475] and the Hebreu toung, and of his docilitie in the Morall Philosophie and the Hebreu toung. But neathir shall suche as will applye them to hear the Lawis, be compelled to heir Medicine; neathir suche as applye them to hear Divinitie be compellit to hear eathir Medicine or yit the Lawis.
SECUND UNIVERSITIE.
Item, In the Secound Universitie, whiche is Glasgu, shalbe twa Colledgeis alanerlie. In the first shalbe ane classe of Dialecticque, ane uther in Mathematicque, the thrid in Phisique, ordourit in all sortis as Sanctandrois.
Item, In the Secound Colledge, four classes; the first in Morall Philosophie, Ethiques, Œconomiques, and Pollitiques; the secound of the Municipale and Romane Lawis; the thrid of the Hebreu toung; the fourt in Divinitie: Which shall be ordourit in all sortis, conforme to it we have writtin in the ordour of the Universitie of Sanctandrois.[476]
THIRD UNIVERSITIE.
The Thrid Universitie of Abirdene shall be conforme to this Universitie of Glasgou, in all sortis.
Item, We think neidfull, that thair be chosin of the body of the Universitie to everie Colledge a man[477] of learnyng, discretioun, and diligence, who shall resave the haill rentis of the Colledge, and distribute the same according to the erectioun of the Colledge, and shall dalie hearkin the dyet comptis; adjoynyng to him oulklie ane of the Readeris or Regentis, above whome he shall [take] attendence upoun thair diligence, alsweill in thair reading, as exercitioun[478] of the youth in the mater taught; upoun the polecye and uphold of the place; and for punischement of crymes, shall hald ane oulklie[479] conventioun with the haill memberis of the Colledge. He shall be comptabile yearlie to the Superintendent, Rectour, and rest of the Principallis convened, about the first of November. His electioun shalbe in this sort: Thair shalbe thre of the maist sufficient men of the Universitie, (not Principallis alreaddie,) nominat by the memberis of the College, sworne to follow thair conscience, whais Principall is departed, and publictlie proponed throu the whole Universitie. Efter the whiche tyme eght dayis, the Superintendent, by him self or his speciall Procuratour, with the Rectour and rest of the Principallis, as are chaptour convened, shall conferme ane of the three thei think maist sufficient, being afore sworne to do the same with singill ee,[480] but respect to feid or favour.
Item, In everie Colledge, we think neidfull at the least ane Steward, ane Cooke, ane Gardnar, ane Portar, wha shall be subject to discipline of the Principale, as the rest.