sō was bī dem münster der kirchof alsō wīt
von den lantliuten weinens alsō vol:
si dienden im nāch tōde als man lieben vriunden sol.
In den tagen vieren, man hāt gesaget daȥ,
ze drīȥec tūsent marken, oder dannoch baȥ,
wart durch sīne sēle den armen dā gegeben.
dō was gelegen ringe sīn grōȥiu schœne und ouch sīn leben.
Dō gote dā wart gedienet und daȥ man vol gesanc,
mit ungefüegem leide vil des volkes ranc.
man hieȥ in ūȥ dem münster zuo dem grabe tragen.