¶ He berith quartly gowles and golde with a bordure inuekkyt of siluer and sable.
Bott ī thes borduris ther is a grete differans emōg men pretendyng theym exꝑte and wyse in thys sciens as specially it is opyn ī tharmys in olde tyme of therle of Marche wheḋ they shulde be calde borduris or not. as here ī thys figure. And certan men say yt men not puttyng a merueles differans of blasyng say: that the forsayd Erle of marche the wiche wos calde Roger Mortememer when that he leuyd bare armys in latyn in thys wyse to say ¶ Portauit arma palata barrata et contraconata de asorio & auro cum vno simplici scuto de argento. Gallice sic. ¶ Il port pale barree girone dasor & dor et vng escu simple dargent. Anglice sic. ¶ He berith paly barri contrari conyt of asure &̄ golde with a sīple shelde of silu̇.
¶ And this opynyon afore rehersit in the blasyng plesyt many a man the wich in no maṅ of whise may be trw. For if thes armys as it is sayd afore war contrari conatit. then the lawist corner or the coone of tharmys that is to say the lawyst poynt of the shelde may neu̇ be of oon colowre as certanly it is of asure.
Over theys thyngys afore rehersit in theys armis it is ċtan that in aƚƚ armys contrari conyt aƚƚ the conys of what sum eu̇ colowre tharmys be made they mete to gedyr conally in the middis of the shelde. as in the next figure of the shelde opynly it shaƚƚ be shewyd. Wher fore as it apperith to my reson trulier they shal be blasit on this wyse: exceppit the gretter autorite that the forsoyd Erle of Marche berith thus in latyn. Portauit arma barrata et caput scuti palatum & angulatum de asorio & auro cum quodam scuto simplici de argento. Et gallice sic. Il port barree et vng Chieff palee cunecte dasor & dor et vng escu simple dargent. Et anglice sic. ¶ He berith barri and a Cheeff pale angulatit of asure and golde with a symple shelde of Silu̇.
Off armys contrari conyt here I wiƚƚ informe yow
Ther be yit for sooth diuerse noble men the wich bore armys contrari conyt. as here in thys scochon apperith. And theys armys be calde contrari conyt for this cause. for aƚƚ the colouris of theys armys meete to gedir at oon coone. that is to say at the myddyst poyntt of the shelde oonly. For eu̇y body triangulit is moore of lengthe then of brede and naamly conyt vt pꝫ. Therfore the opynyon of thos men the wyche sayd that the armys afore rehersit: that is to witte of therles armys of Marche war palyt barrit and contrari conyt is to be repreuyt. for so mych that the conys of the forsayd armys accorde not the wich of necessite shulde accorde iff the forsayd opynyon wer trw. And of hym that beris theys armys ye shaƚƚ say in latyn. Portat arma contraconata de blodio et albo Et gallice sic. Il port girone dasor et dargent. Anglice sic. He berith contrari conyt of asure and siluer.
Off pilit armys now here it shaƚƚ be shewyt:
