For as mych as it is spokyn afore of armys: in the wich the colowris mete to gedyr in the myddist poynt coonly. Now folowyth of certan armys in the wich iij. pilis mete to gedyr in oon coone. as here in thys figure. And it shaƚƚ be sayde of hym the wiche beris theys armys in latyn in thys wyse. ¶ Portat tres pilas nigras in campo aureo. Gallice sic. Il port dor trois piles de sable. Et anglice sic. ¶ He berith golde .iij. pilis of sable.
¶ Of ballis in armys here now it shaƚƚ be shewyt.
Neuer the les ye most consydyr a differans ī theys blasyngys of theys armys afore: and theys that cum after when ye blase theym in latyn tong. for other while thys terme pila ī latyn is take for to be a peese of tymbre to be put vnder the pelor of a bryge: or to syche a like werke as ī thexempuƚƚ afor And odyr while this terme pila is take for a certan rounde īstrumēt to play wt: the wich īstrumēt ẜuys other while to the hande and then it is calde ī latyn pila manualis as here And other while it is an instrument for the foote and then it is calde in latyn pila pedalis a fote bal Therfor it shaƚƚ be sayd of ħym that beris thes armys in latyn Portat tres pilas argenteas in campo rubio. Et gallice sic. ¶ Il port de gowlez trois pelettit dargent. Et anglice sic. ¶ He berith gowles iij. ballis of Siluer.
Certanli ye most merke that ī this figure of ballis a mā may soon er. Werfore shortly it is to be knaw that sich ballis may haue aƚƚ colowris bot the colowre of golde for & thei be of goldyn colouris: they shulde be calde talentis or besantis the wiche be eu̇ of golden colowre.
Off tortellys or litiƚƚ Cakys in armys.
Ther be also tortellis yt be litiƚƚ Cakys the wich be grettir then ballys & tharmys be truly made as here it is opyn. And he that beris theys armys beris in this wyse first ī latyn. ¶ Portat tres tortellas rubias ī campo aureo. Gallice sic. ¶ Il port dor et trois torteulx de gowlez. Et anglice sic. ¶ He berith golde & .iij. Cakys of gowles.
More ouer merke: that as wele ballys in armys as kakis and besantis aƚƚ way ar hooƚƚ rownde figuris &̄ not ꝑforat