JEAN BERTAUT
CHANSON
Les Cieux inexorables
Me sont si rigoureux,
Que les plus miserables
Se comparans à moy se trouveraient heureux.
Je ne fais à toute heure
Que souhaiter la mort,
Dont la longue demeure
Prolonge dessus moy l'insolence du Sort.
Mon lict est de mes larmes
Trempé toutes les nuits:
Et ne peuvent ses charmes,
Lors mesme que je dors, endormir mes ennuis.
Si je fay quelque songe
J'en suis espouvanté,
Car mesme son mensonge
Exprime de mes maux la triste vérité.
Toute paix, toute joye
A pris de moy congé,
Laissant mon âme en proye
A cent mille soucis dont mon coeur est rongé.
La pitié, la justice,
La constance, et la foy,
Cédant à l'artifice,
Dedans les coeurs humains sont esteintes pour moy.
L'ingratitude paye
Ma fidelle amitié:
La calomnie essaye
A rendre mes tourments indignes de pitié.
En un cruel orage
On me laisse périr,
Et courant au naufrage
Je voy chacun me plaindre et nul me secourir.