¶ Of ii nonnes that were shryuen of one preste. lxii.
¶ In the tyme of Lente there came two nonnes to saynte Johnns in London bycause of the great pardon, there to be confessed. Of the whyche nonnes, the one was a young lady and the other was olde. This yonge lady chose fyrst her confessour, and confessed her that she hadde synned in lechery. The confessour asked, with whome it was; she sayd it was with a lustye gallante. He demaunded where it was; she sayd: in a plesaunte grene herber. He asked further: whan it was. She sayd: in the mery moneth of Maye. Than sayd the confessour this wyse: a fayre yonge lady, with a lusty galante, in a plesaunte herber, and in the mery moneth of Maye! Ye dyd but your kynde! Nowe, by my truthe, God forgyue you, and I do; and so she departed. And incontynent the olde nonne mette with her, askynge her howe she lyked her confessour; whiche sayd he was the best gostly father that euer she hadde and the most easyest in penaunce-geuyng. For comfort wherof this other nonne went to the same confessour and shroue her lykewyse, that she had synned in lechery. And he demaunded with whome. Whiche sayde: with an old frere. He asked where. She said: in her olde cloyster. He asked: what season. She sayde: in Lente. Than the confessour sayd: an old ——, to lye with an old frere, in her olde cloyster, and in the holy tyme of Lente! by cockes body,[106] if God forgyue the, yet wyll I neuer forgyue the. Which wordes caused her to departe all sadde and sore abasshed.
By this tale men may lerne, that a vicyous acte is more abhomynable in one person than in another, in one season than in another, and in one place than in an other.[107]
¶ Of the esquyer that sholde have ben made knyght. lxiii.
4 lines of the original are wanting.
and the trumpettes began to blowe, a yonge squyer of Englande rydynge on a lusty courser of whych horse the noyse of the trumpettes so prycked the corage, that the squyer could nat him retayne; so that agaynste his wyll he ranne vpon hys enemyes. Whyche squyer, seynge none other remedy, sette his spere in the rest and rode throughe the thyckest of hys enemyes, and in conclusyon had good fortune, and saued hym selfe alyue without hurte: and the Englysshe hooste folowed and had the victorye. And after, whan the felde was wonne, this kynge Edwarde called the squyre and badde hym knele down, and he wolde make hym knyght, because he valyauntely was the man that day, which with the moost couragyous stomake aduentured fyrste vpon theyr enemyes. To whome the squyer thus answered: if it lyke your grace to make any one knyghte therfore, I beseche you to make my horse knyght, and nat me: for certes it was his dede, and nat myne, and full sore agaynst my wyll. Whiche answere the kynge herynge refrayned to promote hym to the order of knyghthode, reputynge hym in maner but for a cowarde; and euer after fauored hym the lesse therfore.
By this tale a man may lerne, howe it is wysedome when he is in good credence to kepe hym[self] therein, and in no wyse to dysable[108] hym selfe to moche.