“substituting y (at the beginning of a word) or gh (elsewhere) for the symbol ȝ, and th for the symbol þ, and v for u when between two vowels.”
¶ Henri, þurȝ Godes fultume king on Engleneloande, Lhoauerd on Yrloande, Duk on Norm(andi), on Aquitaine, and Eorl on Aniow, send igretinge to alle hise holde ilærde and ileawede on Huntendoneschire: þæt witen ȝe wel alle, þæt we willen and unnen þæt, þæt ure rædesmen alle, oþer þe moare dæl of heom þæt beoþ ichosen þurȝ us and þurȝ þæt loandes folk on ure kuneriche, habbeþ idon and schullen don in þe worþnesse of Gode and on ure treowþe, for þe freme of þe loande, þurȝ þe besiȝte of þan to-foren iseide redesmen, beo stedefaest and ilestinde in alle þinge, abuten ænde.
And we hoaten alle ure treowe, in þe treowþe þæt heo us ogen, þæt heo stedefæstliche healden, and swerien to healden and to werien, þo isetnesses þæt beon imakede and beon to makien, þurȝ þan to-foren iseide rædesmen, oþer þurȝ þe moare dæl of hem, alswo also hit is biforen iseid; And þæt æhc oþer helpe þæt for to done bi þan ilche oþe, ayenes alle men, riȝt for to done and to foangen. And noan ne nime of loande ne of eȝte, wherþurȝ þis besiȝte muȝe beon ilet oþer iwersed on onie wise.
And ȝif oni oþer onie cumen her onyenes, we willen and hoaten þæt alle ure treowe heom healden deadliche ifoan. And for þæt we willen þæt þis beo stedefæst and lestinde, we senden ȝew þis writ open, iseined wiþ ure seel, to halden a-manges ȝew me hord.
Witnesse us selven æt Lundene, þane eȝtetenþe day on þe monþe of Octobre, in þe two and fowertiȝþe ȝeare of ure cruninge.
And þis wes idon ætforen ure isworene redesmen, Boneface archebischop on Kanterburi, Walter of Cantelow, bischop on Wirechestre, Simon of Muntfort, eorl on Leirchestre, Richard of Clare, eorl on Glowchestre and on Hurtforde, Roger Bigod, eorl on Norþfolke and marescal on Engleneloande, Perres of Sauueye, Willelm of Fort, eorl on Aubemarle, Iohan of Pleisseiz, eorl on Warewike, Iohan Geffreës sune, Perres of Muntfort, Richard of Grey, Roger of Mortemer, James of Aldiþel; and ætforen oþre inoȝe.
¶ And al on þo ilche worden is isend in-to ævrihce oþre shcire ouer al þære kuneriche on Engleneloande, and ek in-tel Irelonde. }