Si bien que cette splendeur vive,
Penetrant doucement un œil,
Fait que l'objet qui luy arrive
Luy resemble un autre Soleil,
Ainsi vostre ame sage et belle,
Ayant tourné long temps vers soy
Pour voir sa beauté immortelle,
La pense voir encore en moy.
Mais des graces et vertus rares
Qui vous font admirer de tous,
Les dieux m'en ont esté avares
Pour les prodiguer dedans vous.
C. Des Roches.
LA PUCE DE MACEFER.
Puce qui as entamé
D'un petit bec affamé
Le teton de ma Charite,
Pour y puiser la liqueur
Nourrice du petit cœur
Qui ton petit corps agite,
Du sang que tu y as pris
Sont animez les espris
Qui donnent vie à Madame;
Du sang que tu as sucçé
Ores dans ton corps mussé
Tu t'es composée vne ame.