ANTHOINE.
Cavaliers, vos desirs ont un effet propice,
Vous aurez cette place, & rendez nous service.
DEMETRIE.
O Dieux! qui connoissez mon amour mieux que moy,
Venez parler de grace en faveur de ma foy,
Ou si vostre grandeur repugne à cét hommage,
Inspirez à ma bouche un celeste langage,
Pour dire à ces Seigneurs combien je suis heureux,
Si le Destin permet que je meure pour eux.
OCTAVE.
Puis que Cassie est mort, je croy qu'en asseurance
Nous pouvons assembler toute nostre puissance,
Pour suivre l'ennemy tandis qu'il est troublé.
ANTHOINE.
Allons le proposer au Conseil assemblé.