Je ne vous poroie mie compter en un jour les nobles disners, les souppers, les festiiemens et les conjoïssemens, les dons, les presens, les jouiaus c’on fist, dounna et presenta, especialment li roys d’Engleterre et medamme le roinne Phelippe, au jentil roy de Cippre. Et bien le devoient faire, car il les estoit venus veoir de loing et à grant fret, et tout pour enhorter et enditer le roy que il volsist prendre le vremeil crois et aidier à ouvrir ce passaige sus les mescreans. Mès li roys s’escuza bellement et sagement et dist qu’il estoit mès trop viés et trop foibles pour aller gueriier si lonch, et qu’il avoit assés affaire à garder son pays et tenir en pès; mès il n’escuoit mie jones chevaliers et escuiers de sa terre, s’il y volloient aller. Si demoura la cose enssi. Pluisseurs parlemens, le tierme d’un mois que li roys de Cippre fu en Engleterre, eut entre le roy englès et le roy de Cippre et leurs conssaux sus l’estat de le croisserie et dou voiaige qui se devoit faire; mès toudis trouvoit il les Englès auques sus uns pourpos si sagement dis et moustrés, qu’il en estoit tous comptens.
Quant il vit qu’il n’en aroit autre cose, il prist congiet au roy, à madamme la roynne et à leurs enffans, qui bellement et doucement li dounnèrent. Et fist li roys englès, par ses offisciiers, paiier et deffretiier le roy de Cippre de tout ce que il et ses gens en menus frès avoient despendut à Londrez; et li dounna une très grosse nef c’on appelloit Catelinne, qui estoit ou havene de Zandvich, et avoit cousté au roy englès plus de dix mil florins au faire: dont li roys de Cippre l’en remercia grandement. On ne sai de ceste nef qu’il en avint, car, depuis, deux ans apriès le departement dou roy de Cippre, je le vi à Zandvich. Si croy mieux que li roys de Cippre le laissa pour l’ensonniement qu’il ewist eut dou mener c’autre cose. J’en demanday, quand je fui là, pourquoy c’estoit, mès nulx ne m’en savoit le voir à dire. Fº 129.
P. [89], l. 31: s’acointa.—Mss. B 3, 4 et mss. A: s’acquitta.
P. [90], l. 11: d’Engleterre.—Mss. A: Edouart.
P. [90], l. 25: enditter.—Ms. A 8: enduire. Fº 232 vº.—Ms. A 15: induire.
P. [90], l. 30: en avant.—Mss. A 8, 15: d’ores en avant.
P. [91], l. 6: traveillent.—Mss. A 8, 15: travaillent.
P. [91], l. 18: se prist.—Mss. A 8, 15: se pena.
P. [91], l. 29: edefiier.—Mss. A 2, 18, 19: crestienner.
P. [91], l. 31: douze mil.—Ms. B 6: dix mille. Fº 629.