P. [58], l. 30: tout.—Le ms. A 8 ajoute: ce.
§ [591]. Quant li princes.—Ms. d’Amiens: Quant li prinches de Galle eut entendu les nouvelles dou roy dant Piere, si en fu tous esmervilliés, et congnut assés qu’il n’estoit mies telx qu’il le supposoit à trouver. En ce temps qu’il estoit en ces variations, li vinrent nouvelles d’Acquittainne, de par madame la princesse et le pays, que li roys Henris volloit entrer et amenner gens d’armes en son pays pour gueriier, ardoir et essillier toutte sa terre d’Acquittainne. Adonc eut li prinches consseil de retourner. Si se mist au retour par deviers Madrigay, et chevaucha tant qu’il vint ou val de Sorrie, et là sejourna, et touttes ses hos, bien un mois. Endementroes eut grans conssaux entre monsigneur Jehan Camdos et le consseil dou roy d’Arragon; car la terre où li prinches sejournoit marcist assés priès de là. Si entendi que consseil se porta enssi adonc que li roys d’Arragon ne ses gens ne devoient de riens grever ne contrariier le prinche ne ses gens, et ossi on ne devoit noient fourfaire au royaumme d’Arragon. Apriès ce, s’en revinrent messires Jehans Camdos et messires Martins de le Kare deviers le roy de Navarre, et pourcachièrent tant que li rois de Navarre acorda à rapasser le prinche et touttes ses gens parmy son royaumme, bien paiiant tout chou qu’il prenderoient.
Si se parti li prinches dou val de Sorrie, et s’aceminna parmy Navarre. Et li roys de Navarre li faisoit grant feste et grant honneur, et le rafresqissoit tous les jours de nouvelles pourveanches, et le conduisi et mena tout parmy le royaumme de Navarre et à la ville de Saint Jehan dou Piet des Pors; là prissent il congiet li ungs de l’autre. Si rapassa li prinches, et ossi fissent touttes ses gens, les destrois de Navarre, et s’en vint li dis prinches à Baione, et li dus de Lancastre, ses frères. Là les rechuprent li bourgois de Baionne moult grandement, et honnourèrent et festiièrent. Si sejournèrent là li dessus dis prinches, li dus de Lancastre et li aucun seigneur bien un mois, et s’y rafresqirent. Si dounna li prinches à touttes mannierres de gens d’armes congiet, et remerchia bellement et sagement les capitainnes, et leur dist qu’il venissent, dedens un certain jour qu’il leur nomma, à Bourdiaux querre leur paiement, et que là seroient il paiiet pour yaux et pour leurs gens. Si se comptentèrent bien li compaignon des parolles dou prinche, et dissent que ses paiemens estoit assés appareilliez.
Enssi se departirent touttes mannières de gens d’armes, qui ens ou voiaige d’Espaigne avoient estet, et se traissent par deviers les landes de Bourdiaux et illuecq environ. Et li prinches, quant il se fu rafreschy en le cité de Bayone, il s’em parti à tout son aroy, et s’en vint vers le bonne chité de Bourdiaux, où il fu recheus à grant feste et grant pourcession, et vint madamme la princesse contre lui, qui amenoit et faisoit aporter Edouwart, son ainnet fil. Dont, quant il s’entrecontrèrent, il se conjoïrent et festiièrent grandement, et descendirent li prinches et les dammes et li signeur en l’abbeie de Saint André, à telle solempnité que vous m’avés oy recorder. Si se tint là li prinches ung grant temps, entendans à ses besoingnes et regardans à ses paiemens pour paiier et lui acquitter deviers les Compaignes, où il estoit grandement tenus. Si paieoit les aucuns, et as autres il acreoit tant qu’il fuist mieux aisiés de paiier, environ le Saint Remy. Apriès, prist congiet li dus de Lancastre au prinche, son frère, et à madamme la princesse, et se parti de Bourdiaux et s’en revint arrierre en Engleterre. Fo 149.
.... En ce meysme temps, passa li dus Aubiers, ad ce donc baus de Haynnau, de Hollande et de Zellandes, et vint en Engleterre, en grant aroy de chevaliers et d’escuiers de son pays, pour veoir le roy englès son oncle et madamme la roynne Phelippe, sa ante et ses chiers cousins leurs enfans. Si fu des dessus dis bien conjoïs et festiiés à Londres et ou castiel de Windesore. Et quant il eut là esté quinze jours, il s’em parti et prist congiet au roy et à le roynne qui li dounna pluisseurs biaux jeuuiaux et à ses chevaliers ossi. Si rapassa li dis dus Aubers la mer à Douvres et arriva à Callais, et revint arrière au Kesnoy en Haynnau, dont il estoit premierement partis, deviers madame Marguerite, la duçoise sa femme....
Quant li prinches fu retournés en son pays, li roys Henris se parti de Baniers et entra en Arragon et rassambla grant gent, Breton, Allemant et Bourghignon; et touttes mannierres de gens qui venoient à lui estoient recheus, et entra de rechief en Castille et y fist grant guerre. Fo 167 vo.
P. [58], l. 31: escusances.—Ms. A 8: excusacions. Fo 289 vo.
P. [59], l. 1: pensieus.—Ms. A 8: pensifz.
P. [59], l. 5: pesans.—Ms. A 8: pensis.
P. [59], l. 6: se.—Ce mot manque dans le ms. A 8.